An hirer Äntwert op d’parlamentaresch Fro n°3219 huet d’Madame Ministesch erkläert, datt et zu Lëtzebuerg méiglech ass, eng IRM ënner Allgemenganästhesie duerchzeféieren, dobäi awer präziséiert, datt eng finanziell Prise en charge vun esou enger Anästhesie net virgesinn ass, well et sech bei enger IRM ëm en „acte de diagnostic“ an net ëm eng Interventioun handelt. De Code de la sécurité sociale gesäit awer d’Prise en charge vu medezinesch néidege Soins vir, ouni prinzipiell tëscht diagnosteschen Akten an intervenéierenden Akten z’ënnerscheeden, wann den effektiven Zougang zu engem Soins dovun ofhänkt.
An deem Zesummenhang hu mir der Regierung dës Froe gestallt:
Kann d’Madame Ministesch präziséieren, op wéi enger konkreter Bestëmmung am Code de la sécurité sociale den Ausschloss vun der Prise en charge vun enger Allgemenganästhesie berout, wann dës medezinesch onverzichtbar ass, fir en diagnosteschen Akt, dee soss vun der Krankekeess iwwerholl gëtt, effektiv duerchzeféieren?
Ass d’Madame Ministesch der Meenung, datt no de Prinzippie vum Code de la sécurité sociale eng Leeschtung, déi medezinesch néideg ass, fir e rembourséierbare Soins kënnen auszeféieren, juristesch vum Haaptakt getrennt an automatesch vun der Prise en charge ausgeschloss ka ginn, och wann den Akt ouni dës Leeschtung materiell net duerchféierbar ass?
Hält d’Madame Ministesch et fir konform mat de Grondsätz, déi sech aus dem Code de la sécurité sociale erginn, datt engem Versécherten den effektiven Zougang zu enger medezinesch indizéierter IRM verweigert gëtt, ouni individuell Evaluatioun vun der Néidegkeet vun der Anästhesie, an eleng opgrond vum Feele vun enger explizitter Tarifikatioun an der Nomenklatur?
Wéi eng konkret Léisunge gesäit d’Madame Ministesch fir Patienten, déi bei der CNS verséchert sinn an déi aus unerkannte medezinesche Grënn – notamment schwéier Klaustrophobie, neurologesch Pathologien, schwéier Angschtstéierungen, morbid Iwwergewiicht oder Onméiglechkeet zur Immobilitéit – objektiv net an der Lag sinn, eng IRM ouni Allgemenganästhesie ze toleréieren?
Hält d’Madame Ministesch et fir vereenbar mam Prinzip vum gläichen Zougang zur Gesondheetsversuergung, datt dës Patienten de facto gezwonge sinn, entweder op d’Ënnersichung ze verzichten oder eng medezinesch néideg Anästhesie aus eegener Täsch ze bezuelen, wärend aner Verséchert mat derselwechter diagnostescher Indikatioun eng voll Prise en charge kréien?
Bestätegt d’Madame Ministesch, datt d’Feelen oder d’Onzoulänglechkeet vun enger Bestëmmung an der Nomenklatur vun de medezineschen Akten a Servicer et rechtlech rechtfäerdege kann, datt e Patient, dee bei der CNS verséchert ass, d’Käschte vun enger medezinesch onverzichtbarer Leeschtung selwer droe muss, fir iwwerhaapt Zougang zu engem néidegen diagnostesche Soins ze kréien?
Am Fall wou et keng explizit gesetzlech Basis am Code de la sécurité sociale gëtt, erkennt d’Madame Ministesch dann d’Existenz vun enger normativer Lück un, déi entweder eng Upassung vun der Nomenklatur oder d’Aféierung vun engem derogatoresche Mechanismus verlaangt, deen eng Fall-zu-Fall-Evaluatioun erméiglecht, fir dat effektivt Recht op Soinen ze garantéieren? • Am affirmative Fall: a wéi enge konkrete Fristen ass eng esou Upassung oder esou e Mechanismus virgesinn? • Am negative Fall: op wéi eng präzis juristesch Grënn stäipt d’Madame Ministesch d’Meenung, datt weder eng Upassung nach en derogatoresche Mechanismus néideg wier, trotz de konkrete Konsequenze fir bestëmmte Patienten, déi bei der CNS verséchert sinn?
QP Nummer 3475
