An de leschte Joren ass d’Digitaliséierung am Commerce ëmmer méi wichteg ginn, dorënner och d’Benotzung vu Keessesystemer a -software. An eisen Nopeschlänner, besonnesch a Frankräich, gëtt et streng Reegele fir d’Zertifizéierung vun dëse Systemer, fir d’TVA-Fraude ze bekämpfen. Esou mussen d’Editeure vun der Software entweder eng Selbstzertifikatioun maachen oder eng Zertifizéierung vun engem akkreditéierten Organisme kréien.
D’Erfarungen aus dem Ausland weisen awer, datt och zertifizéiert Systemer duerch Modifikatioune bei der Installatioun oder duerch Duebel-Keessesystemer kënne fir frauduléis Praktike genotzt ginn. Am Kontext vun der europäescher Harmonisatioun vun der TVA-Gesetzgebung ass et wichteg ze verstoen, wéi Lëtzebuerg sech an dësem Beräich positionéiert an ob et eng obligatoresch Zertifizéierung fir Keessesystemer gëtt.
An deem Zesummenhang hu mir der Regierung dës Froe gestallt:
-
Wéi eng legal Dispositioune bestinn zu Lëtzebuerg fir d’Zertifizéierung vu Keessesystemer a -software?
-
Wéi kënnen d’Cliente sécher sinn, datt d’Keessesystemer déi si kafen, konform zu de gesetzleche Virschrëfte sinn?
-
Gëtt et zu Lëtzebuerg eng Statistik iwwer d’Unzuel vu Fäll, wou Keessesystemer fir TVA-Fraude genotzt goufen?
-
Wéi positionéiert sech d’Regierung zum aktuelle franséische System vun der duebeler Zertifizéierung (Selbstzertifikatioun oder extern Zertifizéierung)?
-
Gëtt et Pläng op europäeschem Niveau fir d’Zertifizéierung vu Keessesystemer ze harmoniséieren, a wéi eng Positioun vertrëtt Lëtzebuerg an dëser Diskussioun?
QP Nummer 1898
