An engem Artikel op RTL vum 13te Januar gëtt iwwert de Phänomeen geschwat, dass mat der Hëllef vu KI respektiv fräi um Internet verfügbare Bildbeaarbechtungsprogrammer pornografescht Material vu Fraen erstallt a duerno am Internet verbreet gëtt. De Moment si vun dësem Phänomeen virun allem Fraen, déi sech am Kader vun engem politesche Mandat engagéieren, vun dësem Verbrieche betraff. Mat dëse sougenannten Deepfakes sollen déi betraffe Fraen diffaméiert an hir Ruff geschiedegt ginn. Awer och aner prominent Persounen, wéi d’Taylor Swift goufe schonn Affer vun esou Deepfakes. Opgrond vun der grousser Verfügbarkeet vun de Programmer kann awer jidderee schnell zum Affer ginn.
An deem Zesummenhang hu mir der Regierung dës Froe gestallt:
-
Sinn hei zu Lëtzebuerg Fäll bekannt, an deene mat der Hëllef vun enger KI pornografesch Deepfake vu Persounen erstallt goufen? Wa jo, wéi vill Fäll si bekannt?
-
Ass geplangt, fir e spezifesche gesetzleche Kader auszeschaffen, fir dëst Zort vu Verbriechen ënner Strof ze stellen?
• Wa jo, wou sinn dës Aarbechten drun?
• Wa nee, firwat net?
QP Nummer 1769
