Am Kader vun der europäescher Direktiv (EU) 2015/1535 muss all Memberstat technesch Virschrëften am Virfeld notifiéieren. Dëst geschitt iwwert de TRIS (système d’information relatif aux règles techniques). Lëtzebuerg huet an dësem Joer ënner anerem den “Projet de loi modifiant la loi modifiée du 11 août 2006 relative à la lutte antitabac” an de “Projet de règlement grand-ducal relatif aux modalités d’exploitation des pompes à chaleur” notifiéiert.
2023 huet Lëtzebuerg insgesamt 13 Notifikatioune gemaach. Bei verschiddene Projeten, wéi dem Projet de loi iwwert den Tubak, koumen detailléiert Remarke vun anere Memberstaaten, der Europäescher Kommissioun an interesséierte Parteien. D’Transparenz vun dësem Prozess an d’Abannung vun de concernéierten Institutiounen ass wichteg fir eng kohärent Gesetzgeebung.
- Wéi gëtt de TRIS-Notifikatiouns-Prozess zu Lëtzebuerg koordinéiert a wéi eng Ministèren si bedeelegt?
- Wéi ginn d’Stellungnamen, déi am Kader vun TRIS-Notifikatiounen erakommen, analyséiert a verschafft? Gëtt et heifir eng standardiséiert Prozedur?
- Gëtt et een Ënnerscheed dertëscht, wéi Stellungname vu Länner, den europäeschen Institutiounen a Stakeholder behandelt ginn?
- Kritt d’Chamber d’Stellungnamen, déi am Kader vun enger TRIS-Notifikatioun erakommen, automatesch matgedeelt? Falls net, firwat net?
- Kritt de Conseil d’État d’Stellungnamen, déi am Kader vun enger TRIS-Notifikatioun erakommen, matgedeelt? Falls jo, a wéi enger Form?
- Bei wéi ville Projeten hunn d’Stellungnamen an de leschten 3 Joer zu substantielle Modifikatioune gefouert?
- Wéi eng Konsequenze gëtt et, wann d’Regierung decidéiert, d’Remarken aus enger TRIS-Notifikatioun net ze berücksichtegen?
- Gëtt et eng ëffentlech zougänglech Plaz, wou d’Bierger d’Stellungnamen nokucke kënnen a gesi kënnen, wéi Lëtzebuerg drop reagéiert huet?
