Transparenz net erwenscht!

Published by Piraten on

D’Pirate fuerderen een Ëmdenken säitens der Majoritéit am Ëmgank mat der Oppositioun a fuerderen eng ëffentlech Stellungnam vum Premier- a Kommunikatiounsminister Xavier Bëttel.

D’Piratepartei ass erféiert iwwert den Ëmgank vun der Majoritéit mat der Oppositioun an der Chamber. D’Piratepartei huet sech an der Affär « Geheime Casier », déi dësen breeden Debat iwwer Dateschutz an Transparenz iwwerhaapt ausgeléist huet, vun Ufank un fir eng transparent Opklärung säitens der Regierung ausgeschwat.

D’Piraten hunn sech haut ee sachlechen Debat iwwer Dateschutz an Transparenz an der Chambre gewënscht, deen di aktuell Froën ëm d’Dignitéit vun de Biergerinnen a Bierger an hirem Recht op e Schutz vun der Privatsphär an de Mëttelpunkt stellt. Datt d’Majoritéit am Parlament genee dësst refuséiert, ass fir eis inakzeptabel. Di aktuell Entwécklung an der Plenière weist, wéi wäit mir zu Lëtzebuerg nach vun enger konstruktiver Diskussiounskultur an enger transparenter Kommunikatioun ewech sinn.

Doriwwer eraus rappelléieren d‘Piraten an deem Kontext och, datt de Xavier Bëttel a senger Funktioun als Kommunikatiounsminister den Dateschutz an d’Dateschutzpolitik a sengen Attributiounen huet. De Premier- a Kommunikatiounsminister Xavier Bëttel ass heimat opgeruff, senger Verantwortung nozekommen, der Chamber, mee och de Biergerinnen a Bierger Ried an Äntwert ze stoen.


0 Comments

Leave a Reply

Your email address will not be published.

This site uses Akismet to reduce spam. Learn how your comment data is processed.