Mir gouf ee Fall zougedroen, wou eng Persoun d’Transkriptioun vun engem auslännesche Führerschäin an e Lëtzebuergesche Führerschäin ugefrot huet. An engem Bréif gouf déi betraffe Persoun opgefuerdert, fir innerhalb vu 4 Wochen ee rezente psychiatresche Rapport eranzeschécken, deen am Detail attestéiert, dass et bei der betraffener Persoun keng medezinesch Conter-Indicatiounen, fir d’Fuere vun engem motoriséierte Gefier gëtt. Sollt déi betraffe Persoun där Opfuerderung net nokommen, géif hir Demande ofgeleent ginn.
An deem Zesummenhang hu mir der Regierung dës Froe gestallt:
-
Virum Hannergrond vun engem grousse Mangel un Dokteren am Beräich vun der Psychiatrie, wéi kann e Ministère vun enger Persoun innerhalb vu 4 Woche e rezente psychiatresche Rapport fuerderen, wëssend, dass et laang Waardezäite fir e Rendezvous bei engem Psychiater gëtt?
-
Sollten dës kuerz Delaie gesetzlech virgeschriwwe sinn, firwat goufen dës Delaien nach net ëmgeännert, fir se un déi aktuell ganz problematesch Situatioun bei verschidden Dokteren unzepassen?
-
Sollten dës kuerz Delaie gesetzlech virgeschriwwe sinn, gedenkt de Minister dës Delaien un déi aktuell ganz problematesch Situatioun bei verschidden Dokteren unzepassen?
• Wa jo, wéini?
• Wa nee, firwat net?
QP Nummer 7494
