Mam Arrêté grand-ducal vum 16ten November 2023 ass d’Demissioun vun der Direktesch vum staatlechen Noriichtendéngscht (SRE) ugeholl ginn. Obwuel virum Récktrëtt an der internationaler Press eng Rei Uschëllegunge vis-à-vis vun der Directrice hirer Aarbechtsweis gemaach goufen, soll d’Demissioun net op e Feelverhalen zeréck goen, mee just dem Wonsch op Pensionéierung vun der Directrice entspriechen. Trotzdeem stellt den Timing eng Rei Froen an de Raum an och d’Uschëllegungen aus der Press verlaangen no Äntwerten. Konkret hu Quelle vun der Press z. B. a Fro gestallt, ob Lëtzebuerg d’Geheimhaltung vun EU- an Nato-Informatiounen ënnert der Leedung vun der eemoleger Directrice konnt garantéieren, a kritiséiert, dass net genuch gemaach gi wier, fir russesch Spionageaktivitéiten ofzewieren. Och d’Bezéiungen an d’Zesummenaarbecht mam Ausland sollen an der Vergaangenheet gelidden hunn, an zwar esou staark, dass Lëtzebuerg vun enger Rei internationalen Informatiounskanäl net méi profitéiere kéint.
An deem Zesummenhang hu mir der Regierung dës Froe gestallt:
-
Huet de Minister Kenntnis vun der Berichterstattung vum Euobserver?
Falls jo: Wéi eng Konsequenzen zitt d’Regierung? -
Ass et richteg, dass et Problemer gouf, d’Geheimhaltung vun internationalen Informatiounen/Dokumenter (z. B. vun der EU an/oder Nato) ze garantéieren?
Falls jo: Wat plangt d’Regierung ze maachen (oder wat gouf schonns gemaach), fir dëse Problem ze léisen? -
Ass et richteg, dass Lëtzebuerg op mindestens ee Kanal fir den internationalen Informatiounsaustausch net méi zougräife kann, ob deen an der Vergaangenheet zougegraff konnt ginn, well et Spannungen tëscht Lëtzebuerg an den USA gouf?
Falls jo: Awéifern ass dëst fir Lëtzebuerg e sécherheetspoliteschen Nodeel a wat huet zu den ugespaante Bezéiunge gefouert?
QP Nummer 47
