ACCOUNT

Problemer beim Accueil vu Patienten am Spidol

Rezent hu sech Stëmmen zu Wuert gemellt, déi bemängelen, dass et am Centre Hospitalier du Nord zu Ettelbréck e Problem géif gi bei der Prise en charge vu Patienten, déi opgrond vu Verletzungen oder Krankheeten an d’Spidol mussen an net um Covid-19 leiden. 

Aus sanitäre Grënn musse Patienten, déi um Covid-19 leiden, wann se am Spidol ukommen, un enger anerer Entrée empfaange gi, wéi Patiente mat anere gesondheetleche Problemer. Vill Spideeler am Land, an dorënner och de Centre Hospitalier du Nord zu Ettelbréck, hunn awer nëmmen eng richteg Ambulanz-Zoufaart. Esou ergëtt sech de Problem, dass déi eng Patiente regulär iwwert de Wee vun enger Ambulanz-Garage kennen am Spidol opgeholl ginn, wärend fir déi aner eng alternativ Entrée muss genotzt ginn, déi leider oft méi schlecht accessibel fir d’Ambulanzen an/oder net iwwerdaacht ass. 

An de vergaangene Méint gouf am Centre Hospitalier du Nord zu Ettelbréck probéiert, dëse Problem duerch eng Zeltanlag ze léisen, mee säit kuerzen, sinn och dës Zelter net méi do. Esou kenne Patienten, déi net um Covid-19 leiden, aktuell zu Ettelbréck vun der Ambulanz just nach bis virun d’Spidol gefouert ginn a mussen dann awer nach ënner fräiem Himmel e Stéck ze Fouss bis an d’Spidol tëppelen, oder mat engem Rollstull oder Brancard gefouert ginn. Jenodeem a wéi engem Zoustand sech e Patient befënnt a wéi d’Wierder ass, kann dësen zousätzleche Wee duerch dat kaalt an naasst Wierder, eng erhieflech Belaaschtung duerstellen.

An deem Zesummenhang hu mir der Gesondheetsministesch dës Froe gestallt:

  • Ass der Ministesch den duergestallte Problem bekannt?
  • Ginn et nach aner Spideeler am Land an deenen et Problemer gëtt, well net genuch iwwerdaachten Zoufaarte fir Ambulanzen existéieren?
  • Wäert d’Ministesch sech mat de betraffene Spideeler a Kontakt setzen, fir eng Léisung auszeschaffen, déi weder Patienten, déi um Covid-19 erkrankt sinn, nach Mënschen, déi aus anere Grënn an d’Spidol mussen, benodeelegt?

Fro n°3264

Verlaf an der Chamber

Zesummenhang posts

De 25te Februar 2022 ass dat neit Denkmalschutzgesetz a Kraaft getrueden. Nom Artikel 18 vum Gesetz kann all Interesséierten an all Organisatioun eng Demande
Haut kruten d’Deputéierten aus der Justizkommissioun een Entworf fir ee Gesetz zu Vorratsdatespäicherung virgeluecht. D’Piraten schwätze kloer vun engem Staubsauger a plaidéiere fir d’Ofschafung
Verschidden Haushalter hei am Land gi mat Fernwärme versuergt, fir hir Wunneng oder hiert Haus ze hëtzen. Och hei sinn d’Präisser a leschter Zäit