Den 13. Mäerz 2024 huet Greenpeace Lëtzebuerg eng Plainte beim OECD National Contact Point (NCP) géint de Fonds de Compensation SICAV-FIS (FDC SICAV-FIS) agereecht. D’Plainte bezitt sech op d’Investissementer vum FDC SICAV-FIS, déi laut Greenpeace net mat den OECD-Richtlinne fir multinational Entreprisen am Beräich vun Ëmwelt, Mënscherechter, Konsumenteninteressen an Informatiounsflichten am Aklang stinn.
De Point de Contact National huet a senger initialer Evaluatioun festgestallt, datt de FDC SICAV-FIS als Entreprise ënner d’OECD-Richtlinne fält an et e suffisante Lien tëschent den Aktivitéite vum FDC SICAV-FIS an de vu Greenpeace opgewise Problemer gëtt. Trotzdeem huet de FDC d’Mediatiounspropos vum Point de Contact National ofgeleent, well en d’Qualifikatioun vum SICAV-FIS als multinational Entreprise contestéiert.
An deem Zesummenhang hu mir der Regierung dës Froe gestallt:
-
Wéi bewäert de Minister d’Decisioun vum FDC, d’Mediatioun duerch den NCP ofzeleenen?
-
Wéi eng Moyene stinn der Regierung zur Verfügung fir de FDC dozou ze beweegen, seng Responsabilitéit am Kader vun den OECD-Richtlinnen unzeerkennen?
-
Ass de Minister bereet, sech dofir anzesetzen datt de FDC seng Positioun iwwerdenkt an un enger Mediatioun deelhëlt?
-
Gesäit de Minister eng Méiglechkeet fir en Dialog tëschent dem FDC an den ONGen iwwert d’Nohaltegkeetsstrategie vum Fonds ze organiséieren?
QP Nummer 1796
