Ëmmer méi heefeg kënnt et vir, dass Krimineller Websäiten erstellen, déi ausgesinn, wéi wann se vun engem Geschäft oder enger Bank wieren. Mat falschen E-Mailen oder SMSen, an deene behaapt gëtt, de Client misst dréngend seng Bank-Donnéeën aginn, ginn d’Leit op esou Websäite gelackelt a kréien do hier Zougangsdate geklaut. Per Web-Banking kënnen déi Kriminell dann op d’Konte vun de Betraffenen zougräifen a maachen se net seelen eidel.
D’Gesetz vum 10. November 2009 gesäit zwar vir, dass eng Bank hire Clienten d’Sue vun engem net-autoriséierte Payement muss zeréck iwwerweisen, mee dëst trefft awer nëmmen zou, wann de Client net duerch eegent Feelverhale selwer eng Matschold dréit.
Rezent waren och Clientë vum POST-Service Eboo betraff.
An deem Zesummenhang hu mir der Regierung dës Froe gestallt:
-
Wéi vill Utilisateuren si vum rezente Phishing-Versuch bei der POST betraff?
-
Wéi ee Gesamtmontant gouf geklaut?
-
Wäert d’Post de Betraffenen en Deel oder d’Gesamtheet vun de geklaute Suen zeréck ginn an eventuell gemaache Scholden net zeréck froen?
-
Ass d’Regierung der Meenung, dass d’Erafalen op eng Phishing-Mesure e perséinlecht Feelverhalen duerstellt, wat geméiss dem Gesetz vum 10. November 2009 dozou féiert, dass ee kee Remboursement ze gutt huet?
Ass d’Regierung der Meenung, dass d’Konsumenten no der aktueller Gesetzgebung gutt genuch geschützt sinn am Fall vu Phishing?
QP Nummer 8377
