An der parlamentarescher Fro n°3987 vum 30. Mäerz 2021 huet den honorabelen Deputéierte Goergen d’Problematik vun Zwangsbestietnesser zu Lëtzebuerg ugeschwat. Hien huet ënner anerem drop higewisen, dass et zu Lëtzebuerg aktuell nach net genuch Méiglechkeete gëtt, fir Mënsche virun Zwangs- a Kannerbestietnesser ze schützen. D’Äntwert vun der Regierung huet zwar op verschidde bestoend Moossname verwisen, awer et bleift d’Fro, ob dës Efforten duer ginn, fir dësem komplexen an dacks verstoppte Problem entgéintzewierken.
Doriwwer eraus huet den Ombudsman fir Kanner a Jugendlecher (OKAJU) a sengem Rapport vun 2022 op d’Risike vun Zwangsbestietnesser zu Lëtzebuerg opmierksam gemaach. Dëst ënnersträicht d’Drénglechkeet, datt mir als Gesellschaft a politesch Verantwortlecher dëser Problematik méi Opmierksamkeet widmen an effektiv Léisungen entwéckelen. Et ass wichteg, datt mir all eis Institutiounen – vun der Schoul iwwer d’Asylservicer bis hin zu eise Geriichter – besser equipéieren, fir dës Fäll ze erkennen, ze verhënneren an d’Affer adequat ze schützen.
- Wéi eng Moossname ginn et, fir jonk Fraen a Meedercher, déi Asyl zu Lëtzebuerg ufroen, virun Zwangsbestietnesser an anere Forme vu sexueller Gewalt ze schützen?
- Wéi gëtt d’Personal vun der Immigratiounsservicer geschoult, fir Fäll vun Zwangsbestietnesser ze erkennen an adequat dorop ze reagéieren?
- Wéi vill Asyldemandë goufen an de leschten 3 Joer op Grond vun Zwangsbestietnesser oder der Gefor vu Genitalverstümmlung gestallt, a wéi vill dovu goufen ugeholl respektiv ofgeleent?
