An Däitschland leeft am Moment eng Diskussioun iwwert d’Flicht, fir d’elektronesch Kommunikatioun vu Ministeren (z. B. ënnert der Form vun SMS oder E-Mailen) z’archivéieren, fir esou eng ëmfaassend Transparenz am Zesummenhang mat Regierungshandlungen ze garantéieren an d’parlamentaresch Kontroll ze vereinfachen. Dëst ass eng direkt Konsequenz vun der sougenannter « Berateraffäre » ronderëm déi fréier Verdeedegungsministesch an haiteg Kommissiounspresidentin Ursula von der Leyen. Zu Lëtzebuerg ass mam Gesetz vum 17. August 2018 en neit Archivgesetz a Kraaft getrueden, dat ënnert anerem reegelt, wat als Archiv a wat als ëffentlecht Archiv consideréiert gëtt (Art. 2 points 1-2).
An deem Zesummenhang huet de Sven Clement der Kulturministesch dës Froe gestallt:
- Wéi behandelt d’lëtzebuergesch Regierung SMS’en an E-Maile vun an tëscht Regierungsmemberen am Kader vum Archivage?
- Gëtt garantéiert, datt eng politesch onofhängeg Instanz iwwert d’Valeur vun de Kommunikatiounspreuven fir d’Archiven entscheet oder entscheeden d’Ministerë selwer, wat si an d’Archive ginn?
- Wéi garantéiert d’Regierung, datt historesch Entscheedungen zu engem spéideren Zäitpunkt nach kennen novollzu ginn, wann dës Entscheedungen mat elektronesche Kommunikatiounsmëttelen iwwermëttelt goufen?
