D’Chamber vun den Deputéierten stellt fest:

• Gemengerotssitzunge sinn nom Prinzip vum Artikel 21 vum Gemengegesetz alle Biergerinnen a Bierger ëffentlech zougänglech;
• d’Ëffentlechkeet an d’Transparenz stäerken d’Demokratie an d’Unerkennung vun den demokrateschen a rechtsstaatlechen Institutiounen, well d’Bierger d’Decisioune vun hire Volleksvertrieder novollzéien an och a Fro stelle kënnen;
• Ëffentlechkeet an Transparenz stäerken d’Vertraue vun de Bierger an d’politesch Decisiounen an hëllefe géint d’Verbreede vun Desinformatioun;
• D’Ëffentlechkeet an d’Transparenz vu Gemengerotssitzungen si verbesserungswierdeg, well d’Sitzungen oft wärend de regulären Aarbechtszäite vu ville Biergerinnen a Bierger stattfannen, d’Bierger sech zu där Zäit physesch an d’Gemeng deplacéiere mussen an dofir Congé missten huelen an och, well d’Plazen am Sall vum Gemengerot limitéiert sinn;
• Den Internet ass ee Mëttel, deen als Bréck tëschent de Bierger an der Politik ka genotzt ginn a verschidde Gemenge bidden op där Basis eng Live-Iwwerdroung vun hire Gemengerotssitzungen am Videoformat un, déi nom Ofschloss vun der Sitzung integral um Internetsite vun der Gemeng ze fannen ass;

Aus dëse Grënn invitéiert d’Chamber vun den Deputéierten d’Regierung:

1. eng Dispositioun anzeféieren, déi d’Live-Iwwerdroung vu Gemengerotssitzunge souwéi d’Publikatioun vun de Sitzungen um Internetsitte vun der Gemeng am Toun- oder Videoformat obligatoresch mécht.