An de leschten Deeg hunn et verschidde Géigende vu Lëtzebuerg mat héije Waasserstänn ze di kritt, besonnesch am Norde vum Land a laanscht der Musel. D’Meteorologe warnen, datt d’Situatioun sech an deenen nächsten Deeg nach verschäerfe kéint. Verschidden Autoritéite wéi d’Police an d’Pompjeeë waren am Asaz, fir Leit aus geféierleche Situatiounen ze retten, wéi rezent zu Perl geschitt. Staarke Reen an domat verbonnen Iwwerschwemmunge wäerten duerch de Klimawandel an Zukunft ëmmer méi heefeg ginn. Et stellt sech d’Fro, wéi d’Regierung op dës Erausfuerderunge reagéiert a wéi eng Moossnamen si geholl huet oder nach wäert huelen.

An deem Zesummenhang hu mir der Regierung dës Froe gestallt:

1. Wéi eng konkret Moossname goufen an de betraffene Regiounen ëmgesat, fir d’Sécherheet vun de Bierger ze garantéieren an d’Ausmooss vun de Schied ze limitéieren?

2. Wéi koordinéiert d’Regierung hir Reaktioun op d’Héichwaasser mat de lokalen Autoritéiten a mat eisen Nopeschlänner? 

3. Wéi eng Hëllef kënne Leit, déi vum Héichwaasser betraff sinn, vum Staat kréien a wéi ginn si iwwert d’Demarchë fir Hëllef ze kréien informéiert? 

4. Wéi wäerten d’Erfarunge vun den Héichwaasser-Situatiounen, déi ëmmer méi dacks a méi staark optrieden, an zukünfteg Preventiounsmoossnamen afléissen?

5. Fäert d’Regierung net, datt duerch ëmmer méi heefeg a staark Iwwerschwemmungen no an no den Iwwerschwemmungsrisiko onversécherbar gëtt? Wéi eng Moossname gi geholl fir dëst ofzefiederen?

Verlaf an der Chamber

QP Nummer 1763