De Méindeg 15te Januar huet d’Police ugefaangen an der Stad dat an der Seance vum 14ten Dezember an der Chamber diskutéierten Heescheverbuet ëmzesetzen an éischt Persounen ze protokolléieren. An der Presse war dann an dësem Kontext ze liesen, dass generell solle Polizist:innen aus aner Regiounen temporär ofgezu ginn an d’Equipe an der Stad ënnerstëtzen. Mir stellen eis hei konkret Froe wat dës Entscheedung ugeet a wëllen eventuell Mëssstänn verhënneren. Aus dësem Grond hu mir dem Här Minister konkret Froen heizou an der Froestonn vum 16te Januar gestallt. Den Här Minister wollt heizou keng Stellung bezéien an huet op déi nächst Kommissiounssëtzung verwisen. Dës ass op Grond vun der allgemenger Alerte rouge den 17te Januar annuléiert ginn. An deem Zesummenhang stelle mir dës an eisen Aen urgent Froen elo iwwert dëse Wee.
An deem Zesummenhang hu mir der Regierung dës Froe gestallt:
-
Aus wat fir Servicer sinn dës genannte Polizisten aus anere Gemengen ofgezu ginn?
-
Aus wat fir Gemenge goufen d’Beamt:innen ofgezunn a wat waren heifir d’Krittären?
-
Wat fir een Impakt huet dës nei Verdeelung vu Beamt:innen op d’Sécherheetssituatioun an de betraffene Gemengen an allgemeng op de Personalschlëssel?
-
Den Här Minister huet dës Decisioune laut sengen eegenen Aussoen an der Froestonn ënnert anerem zesumme mat der Stad Lëtzebuerg geholl. Sinn och déi Betraffen aus den aner Gemengen an d’Gespréicher an d’Entscheedung mat agebonne ginn?
