D’Prozedur fir d’Aschreiwe vun engem Partenariat civil (PACS) setzt d’Constitutioun vun engem Dossier mat verschiddenen offiziellen Dokumenter viraus. Dozou gehéiert ënner anerem en integralen Auszuch vum Gebuertsakt (“acte de naissance intégral”). Wéi aus de Renseignementer op den informativen Internetsäite vun der Verwaltung, wéi och aus direkte Réckmeldunge vu Bierger, ervirgeet, schéngt d’Gëltegkeet vun dësem spezifeschen Dokument fir d’Finaliséierung vum Dossier op dräi Méint limitéiert ze sinn. Dës kuerz Frist stellt fir déi betraffe Persounen eng administrativ Hürd an e potenziellen zousätzleche Käschtepunkt duer. D’Noutwennegkeet, rezent Dokumenter unzefroen, ass schwéier nozevollzéien, well d’Kärinformatiounen, déi duerch dësen Akt attestéiert ginn – wéi d’Gebuert an d’Filiatioun – onverännerbar sinn. Dës Praxis schéngt och am Widdersproch zu den Ziler vun der administrativer Vereinfachung an der Digitaliséierung ze stoen. Et stellt sech dowéinst d’Fro, wat déi legal Justifikatioun fir dës Restriktioun ass an ob dës och fir aner Prozedure vum État civil, wéi d’Bestietnes, zur Uwendung kënnt.
An deem Zesummenhang hu mir der Regierung dës Froe gestallt:
Kann d’Ministesch bestätegen, datt den integralen Auszuch vum Gebuertsakt (“acte de naissance intégral”), dee fir d’Constitutioun vun engem PACS-Dossier néideg ass, eng Gëltegkeetsdauer vun nëmmen dräi Méint huet?
Wann jo, op wéi enger legaler Grondlag baséiert dës Zäitlimitt vun dräi Méint, obwuel d’Donnéeën op dësem Akt als permanent ugesi ginn?
Fënnt dës selwecht Gëltegkeetsbeschränkung vun dräi Méint och Uwendung op den integralen Auszuch vum Gebuertsakt, dee fir d’Schléisse vun engem Bestietnes (“mariage”) erfuerderlech ass?
Wéi eng aner Dokumenter, déi fir d’Prozedure vum PACS oder dem Bestietnes néideg sinn, ënnerleien enger änlech kuerzer Gëltegkeetsfrist (z. B. dräi oder sechs Méint)?
Gedenkt d’Regierung, dës kuerz Gëltegkeetsfriste fir Dokumenter vum État civil am Kontext vun der administrativer Vereinfachung ze iwwerschaffen an eventuell unzepassen oder ofzeschafen?
QP Nummer 3195
