An de leschte Joren hunn ëmmer méi europäesch Länner d’Benotzung vu Fale mat Colle fir Nagedéiere verbueden. Ënner anerem hunn d’Belsch, England, Wales, Island a Spuenien dës Fale komplett verbueden, wärend Irland, Schottland an Neiséiland de Verkaf verbueden hunn. Dës Entscheedunge baséieren op der Erkenntnis, datt Fale mat Collen eng besonnesch grausam Method sinn, bei där d’Déieren dacks iwwer Deeg leiden ier se un Dehydratioun oder Ënnerernärung stierwen.
D’Problematik gëtt nach méi grouss well dës Falen net selektiv sinn. Nieft de Nagedéiere ginn och geschützt Aarte wéi Igelen a Fliedermais gefaangen. A verschiddenen Nopeschlänner hunn dofir och schonn eenzel Geschäftsketten decidéiert, dës Produiten net méi ze verkafen.
An deem Zesummenhang hu mir der Regierung dës Froe gestallt:
-
Wéi ass déi aktuell legal Situatioun zu Lëtzebuerg betreffend d’Produktioun, de Verkaf an d’Benotzung vu Fale mat Colle fir Nagedéieren? Sinn dës vum Artikel 12 vum Gesetz vum 27 Juni 2018 couvréiert?
-
Wéi vill Fale mat Colle gi schätzungsweis all Joer zu Lëtzebuerg verkaf?
-
Gëtt et zu Lëtzebuerg dokumentéiert Fäll vu geschützten Aarten, déi an esou Fale gestuerwe sinn?
-
Plangt d’Regierung eng Gesetzgebung fir de Verkaf an d’Benotzung vu Fale mat Colle fir Nagedéieren ze reglementéieren oder ze verbidden?
-
Wéi eng Alternative recommandéiert d’Regierung fir eng méi human Kontroll vun Nagedéieren, besonnesch a Wunngebaier?
QP Nummer 1897
