D’Evaluatioun vu Gesetzer ass e wichtegt Instrument fir d’Effektivitéit an d’Effizienz vun eise Gesetzer ze iwwerpréiwen an ze verbesseren. An Däitschland gëtt et zum Beispill eng Prozedur fir Steiergesetzer ze evaluéieren. A Lëtzebuerg hu mir eng Traditioun fir Motiounen ze stëmmen, déi d’Regierung dozou opfuerderen, Gesetzer no enger gewësser Zäit ze evaluéieren. Virun dësem Hannergrond stellen sech Froen iwwert eis Praxis bei Gesetzer, déi de Budget oder steierlech Froen impaktéieren.
- Wéi eng Gesetzer aus dem Finanzberäich goufen an de leschte 5 Joer evaluéiert a wéi eng Resultater hunn dës Evaluatioune bruecht?
- Gëtt et eng systematesch Prozedur fir Finanz- a Steiergesetzer no enger gewësser Zäit ze evaluéieren? Wann jo, wéi gesäit dës aus?
- Wéi eng Krittäre ginn ugewannt fir ze entscheeden ob e Gesetz am Finanzberäich evaluéiert soll ginn?
- Gëtt et Pläng fir d’Evaluatiounspraxis am Finanzberäich ze verstäerken oder ze verbesseren? Wann jo, wéi gesinn dës Pläng aus?
- Wéi gëtt d’Transparenz vun den Evaluatiounsresultater am Finanzberäich sécher gestallt? Ginn d’Resultater der Ëffentlechkeet zougänglech gemaach?
