D’Piraten hunn dem Sportminister an dem Finanzminister eng parlamentaresch Fro iwwert eng Revisioun vun de Steiererklärunge gestalt.
Am Folgende fannt der den Text zu eiser Fro:
Verschidde Steierbüroen am Land hunn an de leschten Deeg e Bréif u verschidde Sportler verschéckt fir dës opzefuerderen hir Steiererklärunge vun 2013 bis 2017 ze verbesseren an ëm d’Akommes aus dem Sport z’ergänzen.
An deem Zesummenhang wéilt ech den Häre Sportminister a Finanzminister dës Froe stellen:
- Wéi vill Bréiwer sinn an dëser Aktioun u wéi vill Sportler verschéckt ginn?
- Op wéi eng Daten hunn sech d’Steierbüroe gestäipt fir d’Empfänger vun de Bréiwer ze bestëmmen?
- Hunn all Steierbüroen dës Bréiwer verschéckt? Gouf et eng Uweisung aus der Hierarchie dëst ze maachen ? Wa jo, wéini gouf dës Uweisung formuléiert a wien huet se formuléiert ?
- Wéi vill zousätzlech Recetten versprécht den Här Finanzminister sech vun dëser Aktioun, wëssend datt nëmmen en Akommes iwwer 5.000 € pro Joer besteierbar oss ?
- Wéi vill huet dës Aktioun d’Verwaltung kascht ? Ech bieden d’Häre Minister dëst opzeschlësselen no Personalkäschten, Portokäschten, Materialkäschten a weidere Käschten.
- Ass geplangt dës Aktioun op aner Felder, déi duerch d’Circulaire LI.R. n° 91/2 vum 11. Juni 2012 ofgedeckt sinn auszeweiten?
- Firwat zitéiert de Bréif un d’Sportler just den § 166 AO an net och § 768 (1) AO ? Wien huet den Inhalt vum Bréif erstallt a fräiginn?
Mat déiwem Respekt,
Sven Clement
Deputéierten
