Den Tour de Luxembourg 2024 war eng exzellent Publicitéit fir de Vëlosport an eng formidabel Publicitéit fir d’Promotioun vun eisem Land. Och eis lëtzebuerger Ekipp huet eng gutt Leeschtung gewisen a mat enger staarker Performance op sech opmierksam gemaach. Den Tour de Luxembourg gouf op 3 vu 5 Kontinenter an an insgesamt 126 Länner iwwerdroen – eng grouss Bün fir eist Land an an Absënns fir de ganzen Tourismussecteur.
Deemnächst wäert mat den Tennis Masters dat nächst grousst Sportevent an der Coque stattfannen – wou den internationalen Dammentennissport an Evidenz gesat gëtt an eist Land eng weider international Visibilitéit kritt. Béid Sportsmanifestatioune vertriede souwuel de Slogan „Visit Luxembourg“ wéi och d’Signatur “Luxembourg – Let’s make it happen”.
- Wéi vill finanziell Ënnerstëtzung hu béid Organisateuren an de Joren 2022 an 2023 fir déi jeeweileg Manifestatioune vum Staat kritt?
- Wéi héich wäert des staatlech finanziell Ënnerstëtzung am Joer 2024 sinn?
- Wéi gesäit d’Regierung d’Evolutioun vun der finanzieller Participatioun vum Staat an den nächste Joren – dëst op Grond vun der internationaler Visibilitéit vu béide Sportsmanifestatiounen?
- Gedenkt d’Regierung hir Participatioun weider ze erhéijen am Sënn vun der Promotioun vun eisem Land?
Wa jo, ëm wéi vill soll déi finanziell Ënnerstëtzung par Rapport zu 2024 erhéicht ginn? - Plangt d’Regierung fir an Zukunft nach aner grouss international Sportsmanifestatiounen hei zou Lëtzebuerg mat „Visit Luxembourg“ an “Luxembourg – Let’s make it happen” promouvéiert ginn, finanziell ze ënnerstëtzen, fir esou international op grousser Bün Reklamm fir eist Land ze maachen?Wa jo, wéi eng Sportsmanifestatioune wieren dat?
