Dual Nationalitéit Lëtzebuerger

Published by Sven Clement on

Ufanks vum 20te Joerhonnert si vill Lëtzebuerger wéinst der schwiereger wirtschaftlecher Situatioun hei am Land emigréiert. Dofir existéieren bis haut eng Rëtsch Communautéite mat lëtzebuergesche Wuerzelen am Ausland, esou z. B. an diverse Länner aus Europa, mee och an den USA oder a Brasilien. Et handelt sech heibäi ëm Lëtzebuerger, déi hiert Land verlooss hunn, ouni dobäi opzehalen Deel vun der Lëtzebuerger Kultur ze sinn.

No enger Ëmfro vu LuxCitizenship mat Amerikaner, déi Virfahren a Lëtzebuerg hunn an dofir d’Lëtzebuerger Nationalitéit ufroe kënnen (oder schonns ugefrot hunn), plangen 81% vun de Befroten iergendwann an hirem Liewen op Lëtzebuerg oder an d’EU ze plënneren an 22% hu konkret Pläng fir déi kommend 5 Joer.
D’Zuele weisen also, dass de Wonsch, zu Lëtzebuerg oder an Europa ze liewen, enk verbonnen ass, mat engem Unhuele vun der Nationalitéit. Fir vill Amerikaner ass et allerdéngs net einfach am Land vun hiren eemolege Virfahre Fouss ze faassen, well si no dräi oder méi Generatiounen, déi an den USA gelieft hunn, d’Lëtzebuerger Sprooch net méi beherrschen. Trotzdeem hunn 83,6% vun de Befroten uginn, si hätten Interessi drun, Lëtzebuergesch ze léieren.

Fir den Auslänner, déi d’Lëtzebuerger Nationalitéit unhuele wëllen, d’Léiere vun eiser Sprooch esou zougänglech wéi méiglech ze maachen, kënne verschidde Fraise rembourséiert ginn, wéi een op Guichet.lu noliese kann:
“Sur demande adressée au ministère de la Justice et sous certaines conditions, le candidat à la nationalité luxembourgeoise peut obtenir le remboursement des frais d’inscription liés :

• à la participation à l’examen d’évaluation de la langue luxembourgeoise (Sproochentest Lëtzebuergesch) ;
• aux cours  de langue luxembourgeoise, organisés par l’Institut national des langues ou par un autre prestataire dont le programme du cours est agréé par le ministère de l’Education nationale.”

Fir Persounen, déi am Ausland schonn d’Lëtzebuerger Nationalitéit unhuelen an dann eréischt op Lëtzebuerg kommen, (esou wéi dat z. B. bei Persoune mat Lëtzebuergesche Virfahren de Fall ass), ass et aktuell net méiglech Sproochecourse rembourséiert ze kréien, well si zu deem Zäitpunkt, wou si am Land ukommen, jo keen “candidat à la nationalité luxembourgeoise” méi sinn, mee e Lëtzebuerger Bierger.

An deem Zesummenhang hu mir der Regierung dës Fro gestallt:

  1. Denkt d’Regierung driwwer no, d’Konditioune fir e Remboursement vu Sproochecoursen esou auszewäiten, dass Persounen och nach wärend enger gewësser Periode nodeems si d’Lëtzebuerger Nationalitéit ugefrot hunn, vun enger Ënnerstëtzung profitéiere kënnen?

Verlaf an der Chamber

QP Nummer 4268