Opgrond vun den aktuell héije Fallzuele vun Infektioune mam Covid-19 kennt et och an de Schoulen ëmmer méi oft dozou, dass Persoune mussen a Quarantaine gesat ginn. Am Fondamental besteet hei de Problem, dass d’Informatiounen aus dem Scolaria net ëmmer der Realitéit um Terrain gerecht ginn. Esou kann et sinn, dass e Kand zwar an enger bestëmmter Klass am Scolaria agedroen ass, vun enger Mise en Quarantaine vun där Klass awer eigentlech net betraff misst sinn, well et eigentlech déi Deeg virdru villäicht gefeelt huet, oder an engem Centre de compétence war. Ëmgedréint kann et awer och sinn, dass e Kand den Informatiounen aus dem Scolaria no kee Kontakt mat enger Klass hat, an a Realitéit awer un Aktivitéiten an där Klass deelgeholl huet. Zousätzlech zu den digitalen Informatiounen aus dem Scolaria, gëtt dofir och ëmmer nach beim Personal um Terrain no Informatioune gefrot, wann et em eng Mise en quarantaine geet. Rezent soll et heibäi awer zu enger Rei Feeler komm sinn, a Persoune solle vun hirer Schoul ënner Quarantaine gesat gi sinn, obwuel d’Santé dovun näischt gewosst hätt, oder hätten op eng Mise en Quarantaine gewaart, well d’Schoul eng ugekënnegt hat, an hätten dono awer kee Bréif vun der Santé kritt. 

An deem Zesummenhang hu mir dem Bildungsminister dës Froe gestallt:

• Sinn der Regierung Problemer wéi déi hei skizzéiert bekannt?
  
• Besëtzt d’Regierung Zuelen doriwwer, wéi vill Ordonnances de mises en quarantaine d’Santé u Schoulpersonal a Schüler ausgestallt huet a wéi vill Schüler a Personal aus de Schoulen tatsächlech a Quarantaine waren?
  
  Falls jo: Wéi gesinn dës Zuelen aus?
  
  Falls nee: Plangt d’Regierung hei an Zukunft Zuelen ze erhiewen, fir e bessere Suivi iwwert d’Decisioune vun der Santé an der Realitéit um Terrain maachen ze kennen?

Fro n°3341