Beim Wunnengsbau hunn d’Gemenge vill Verantwortung. Esou sinn d’Gemengen zoustänneg fir d’Baugeneemegungen op hirem Territoire. D’Baugeneemegung gëtt ausgestallt, wann ee Bauplang konform ass mat de Gesetzer, Gemengereglementer a groussherzogleche Reglementer, déi an der Matière existéieren.
Mat der Baugeneemegung dierf ee Bauhär dann ufänke mat bauen. D’Gebai muss dann no de Pläng gebaut ginn. No der Fäerdegstellung vum Gebai muss d’Gebai esou stoen, wéi et um Bauplang uginn ass.
An deem Zesummenhang hu mir der Regierung dës Froe gestallt:
-
Wat muss eng Gemeng nom Fäerdegstelle vun engem Wunngebai kontrolléieren?
-
Falen ënnert d’Kontrollen duerch d’Gemeng och technesch Aspekter, wéi zum Beispill, dass d’Ofwaasserleitungen esou installéiert sinn, wéi se um Bauplang agezeechent waren?
-
Wéi muss eng Gemeng handelen, wann de Bau net dem Bauplang entsprécht, fir deen d’Baugeneemegung erdeelt gouf?
-
Wéi eng Derogatioune kënne gemaach ginn, wann ee Wunngebai net der Baugeneemegung entsprécht?
-
Ab wéini kann d’Gemeng fuerderen, dass ee Bau muss ofgeännert ginn, wann en net dem Bauplang entsprécht, fir deen d’Baugeneemegung erdeelt gouf?
-
U wie kënnen d’Bierger:innen (zum Beispill concernéiert Noperen) sech wenden, wann si wëssen, dass ee Gebai net der Baugeneemegung entsprécht?
QP Nummer 907
