aktuelle Stand vun der Elektromobilitéit

Published by Piraten on

Den deemolegen an aktuelle Mobilitéitsminister hat an engem Interview vum 16te September 2017 am Tageblatt ugekënnegt, dass bis d’Joer 2020 insgesamt 40000 Elektroautoen op eise Stroosse rulle sollen. An der parlamentarescher Fro n°1248 huet den aktuelle Mobilitéitsminister awer erkläert, dass dat Zil vu 40000 Elektroautoen zu Lëtzebuerg bis Enn 2020 net erreecht géif ginn, woumadder e sollt Recht behalen. Stand haut si mer hei am Land bei ronn 13000 rengen Elektroautoe bei engem Gesamtfuerpark vu ronn 600000 Autoen (data.public.lu). Dat sinn 2 Prozent.

Dat neit erkläerten Zil vum Minister soll et sinn, dass bis 2030 d’Hallschent (50%) vum nationale Fuerpark Elektroautoe sinn. Dat wieren, op d’Zuele vun haut gekuckt, ronn 300000 E-Autoen. Dat setzt viraus, dass mer hei am Land och genuch Kapazitéiten hunn, fir dës Autoen opzelueden – an dat doheem wéi och am ëffentleche Raum. De Minister sot an engem Interview mam Lëtzebuerg Land vum 21te Januar 2022: “Die meisten Menschen werden ihr Auto aber eh zuhause aufladen.”

Verschidden Haushälter bekloen awer elo schonn, dass si nëmme beschränkt Luetstatioune bei sech doheem installéiere kënnen, well d’Leeschtung um Netz et net hiergëtt. Esou krute Persoune keng Luetstatioun bei sech doheem installéiert, well net genuch Kapazitéiten am Netz waren. D’Installatioun vun enger Luetstatioun géif mat sech bréngen, dass am Haus oder bei den Nopere kee Stroum do wier, dee Moment, wou den Auto géif un der Prise hänken.

An deem Zesummenhang hu mir der Regierung dës Froe gestallt:

  1. Wéi vill Elektroautoe goufen zënter 2017, opgelëscht pro Joer, hei am Land immatrikuléiert?  Wat ass de relativen Undeel par Rapport zur Gesamtzuel un Nei-Immatrikulatiounen?

  2. Wéi vill ëffentlech Luetstatioune ginn et aktuell hei am Land?  Wéi verdeelen sech dës Luetstatiounen op déi verschidde Kantonen? Wéi verdeelen sech dës Luetstatiounen op déi verschidde Gemengen?

  3. A wéi ville Fäll krut ee Proprietaire an deene leschten 3 Joer refuséiert, eng Luetstatioun (opgeschlësselt pro Joer no privat an ëfffentlech) z’installéieren a wat waren d’Grënn vum Refus?

  4. Wéi gesäit de Plang vun der Regierung aus, fir dass bis 2030 déi 300000 Elektroautoen kënnen doheem  opgeluede ginn, onofhängeg dovunner, wéi d’Netzleeschtung ausgesäit?

 

Verlaf an der Chamber

QP Nummer 6522


1 Comment

Marie Francoise Humbert · 23/07/2022 at 21:13

Nohalteg liewen ass aus Villen Ursachen net drann: bio ass 30% me deier, Elektroautos och a sinn mat de Batterien nach net top, we all Innovation. Luedstationen gin et der net genug a mam Strom ass dat och nach e ? bei eisen Ressourcen. Rom ass net an engem Dag gebaut gin.

Leave a Reply

Your email address will not be published.

This site uses Akismet to reduce spam. Learn how your comment data is processed.