Zu Lëtzebuerg muss am Déiereschutz nach vill gemaach ginn. Trotz 6 Joer “déi Gréng” an der Regierung, ginn et nach vill Mëssstänn hei am Land. Mer hunn d’Regierung e puer Froen iwwert gewësse Punkte vum Déiereschutzgesetz ugeschwat.
An der Äntwert op eis parlamentaresch Fro n°554 iwwert d’Haltung vun den Déiere krute mer vum Minister Romain Schneider d’Äntwert, dass grad emol 1 Fall zu Lëtzebuerg erfaasst ginn ass, bei dem géint d’Artikelen zur Haltung vun den Déiere verstouss ginn ass a vun der Justiz poursuivéiert gouf.
All aktiven Déiereschützer weess, dass hei am Land all Dag géint dëst Gesetz verstouss gëtt. D’Zuele belee nëmmen, dass de Ministère mat senger Veterinärsinspektioun net genuch Kontrollen duerchféieren.
Mer fuerderen, dass dass d’Regierung endlech d’Moyene bereetstellt, fir d’Kontrollen hei am Land ze verstäerken. D’Déieren hei am Land waarden op eng Ëmsetzung vum neien Déiereschutzgesetz! Falls d’Regierung net handelt, ass dat Gesetz nëmmen ee Lapp Pabeier, dee net respektéiert gëtt.
