Rezent hunn Holland, Däitschland, Finnland an och d’Belsch hir Reesrecommandatioune fir LGBTQ+ Persounen, déi an d’USA reesen, verschäerft. Dës Ännerunge sinn eng Reaktioun op d’Politik vun der neier Trump-Administratioun, déi verschidde Schutzmoossname fir sexuell Minoritéiten ofgeschaaft huet, dorënner d’Aféierung vun enger strikt binärer Geschlechteridentifikatioun (männlech oder weiblech) op Päss a Visaen.
Den hollänneschen Ausseministère huet elo an hirem Reesportal präziséiert, dass “Gesetzer a Gebräicher an den USA vis-à-vis vun LGBTQI+ Leit vun deenen an Holland ofwäiche kënnen.” Dës Ännerung ersetzt eng fréier Ausso, déi uginn huet, dass d’US-Gesetzer “vergläichbar mat deenen an Holland” wieren.

An deem Zesummenhang hu mir der Regierung dës Froe gestallt:

1. Huet d’Lëtzebuerger Regierung virgesinn, hir Recommandatioune fir LGBTQ+ Persounen, déi an d’USA reesen, och ze verschäerfen?
   • Falls jo, wéi eng konkret Ännerungen si geplangt a wéini ginn dës ëmgesat?
   • Falls nee, op wéi enger Basis huet d’Regierung decidéiert, hir aktuell Rotschléi bäizebehalen?

2. Wéi eng Moossname sinn aktuell en place fir d’Sécherheet an d’Wuelbefanne vun LGBTQ+ Lëtzebuerger Bierger am Ausland ze garantéieren, besonnesch a Länner wou hir Rechter ageschränkt ginn?

3. Gesäit d’Regierung vir, dëst Thema bei bilateralen oder multilateralen Treffe mat den USA unzeschwätzen?

Verlaf an der Chamber

QP Nummer 2154