D’Ukënnegung vum US-President Donald Trump fir zousätzlech Douanentariffer vun 25% op Autoen an Automobildeeler anzeféieren huet Bedenken iwwert hir wirtschaftlech Auswierkungen op d’europäesch Wirtschaft, dorënner och Lëtzebuerg, ausgeléist. Laut dem Wirtschaftsexperte Ruben Dewitte vun der ING kéint den direkten a méi indirekten Impakt op d’Lëtzebuerger Wirtschaft trotz enger limitéierter direkter Expositioun vu just 0,13% vum PIB, bis zu 0,98% vum PIB erreechen, well eist Land eng wichteg Roll a regionalen Handelsflëss spillt.
Lëtzebuerg exportéiert Wueren am Wäert vun 515 Milliounen Euro an d’USA, wat 15,8% vun eisen extrakommunitären Exporter entsprécht. Och wann eist Land haaptsächlech eng Servicewirtschaft ass, kéinten d’Douanentariffer indirekt Lëtzebuerg treffen andeems se negativ op europäesch Wäertschöpfungsketten wierken, an deenen och lëtzebuergesch Servicer a Produkter agebonnen sinn.
An deem Zesummenhang hu mir der Regierung dës Froe gestallt:
-
Wéi vill Lëtzebuerger Betriber a Salariéen sinn direkt betraff vun den neien US-Douanentariffer, besonnesch am Automobilsektor a senge Zouliwwerer?
-
Kann d’Regierung d’Schätzungen, déi am Artikel vum Paperjam publizéiert goufen, confirméieren, datt d’Auswierkungen op de lëtzebuerger PIB bei ongeféier 0,98% leien?
-
Wat sinn d’Schätzungen vun der Regierung iwwert potentiell Akommes- a Steierverloschter fir de Staat?
-
Wéi eng Moossnamen plangt d’Regierung fir betraffe Lëtzebuerger Betriber ze ënnerstëtzen a potenziell Aarbechtsplazverloschter ze vermeiden?
-
Wéi eng Strategie huet d’Regierung am Kader vun der EU-Handelspolitik, fir d’Lëtzebuerger Wirtschaftsinteressen ze verdeedegen?
QP Nummer 2155
