Am Kontext vun der Schoulrentrée stellt sech och dëst Joer erëm d’Fro vum Schoulschwammen a generell vum Manktem u Schwammmeeschtere respektiv Schwammmeeschteschen. De Sportminister huet an engem Interview am Mee dëst Joer eng Campagne annoncéiert fir méi Schwammmeeschteren a Schwammmeeschtesche fir d’Ausübe vun dësem Beruff ze begeeschteren.
- Wéi genau gesäit d’Ausbildung vum Beruff vum Schwammmeeschter aus?
- Wéi vill Leit hunn zanter 2018 dës Ausbildung ugefaang an och ofgeschloss?
- Wéi vill vun dëse Leit hunn ofgebrach? Aus wat fir Grënn hunn dës Leit d’Ausbildung ofgebrach?
- Wéi vill Leit si fir d’Schoulrentrée 2024/2025 pro Ausbildungsjoer als Schwammmeeschter ageschriwwen?
- Wat sinn d’Ursaache firwat manner Leit bereet sinn dëse Beruff ze ergräifen?
- Gedenkt d’Regierung d’Grille horaire vun der Ausbildung unzepassen, fir manner Wäert op d’Chimie ze leeën?
- Wuel wëssend, dass a gréissere Schwämmen hei am Land d’Opbereedung vum Waasser vun externe Firmen iwwerholl gëtt, gedenkt d’Regierung eng parallel Filière vun der Ausbildung vum Schwammmeeschter unzebidden, wou d’Chimiescoursen ewechfalen?
- An wéi enger Form a wéini gedenkt d’Regierung eng Campagne fir de Beruff vum Schwammmeeschter ze lancéieren?
- Wéi gesinn d’Konditiounen aus, fir dass d’Ausbildung vun de Schwammmeeschter aus Däitschland, Frankräich an der Belsch zu Lëtzebuerg unerkannt kënne ginn?
- Gedenkt d’Regierung dës Ausbildung an Zukunft unzeerkennen?
- Wéi vill Schoulklassen, an deene Kanner aus de Cyclen 1.1 an 1.2 scolariséiert sinn, ginn net reegelméisseg schwammen?
- Wat gedenkt d’Regierung ze ënnerhuele fir dëse Prozentsaz ze verklengeren?
- Laut dem Plan d’études sollen d’Schoulkanner nom Cycle 4 an der Grondschoul ouni Ënnerbriechung eng Distanz vun 100 m schwamme kënnen – wéi vill Schoulkanner areechen dëst Ziel a wéi vill Kanner areechen dëst net um Enn vum Cycle 4?
- Wat sinn d’Grënn dofir?
- Wat gedenkt d’Regierung ze ënnerhuelen, fir dass an Zukunft all Kand an der Grondschoul schwamme kann?
- Gedenkt d’Regierung an Zukunft déi dofir ausgebilten d’Schwammmeeschtere méi an d’Schoulschwammen an der Grondschoul matanzebezéien?
- Gedenkt d’Regierung den „Reglement grand-ducal du 31 juillet 1990 établissant des mesures de sécurité dans l’intérêt de la natation scolaire » deemnächst unzepassen?
- Wat gedenkt d’Regierung ze ënnerhuelen, fir dass och d’Schwämme vun de Lycéeë fir d’Allgemengheet respektiv fir d’Schwammveräiner disponibel wäerte sinn?
- Am Kontext vum Manktem u Schwammmeeschteren hat de Sportminister iwwert d’Iddi vun engem Pool vu pensionéierte Schwammmeeschtere geschwat – wou sinn dës Iwwerleeungen drun?
