Wéi Recherchë vum WDR a vum BR erginn hunn, huet dat däitscht Bundeskriminalamt (BKA) scho säit enger Rei Joren d’Mëttel fir WhatsApp-Chatverleef matzeliesen, an dëst ganz ouni den Asaz vu Staatstrojaner.
D’Resultater vun der Recherche, zu deenen och en internt Dokument vum BKA soll gehéieren, wat um Site netzpolitik.org publizéiert gouf, loossen drop schléissen, dass eng Kommunikatioun iwwer WhatsApp méi einfach iwwerwaacht ka ginn, wéi dat an der breeder Bevëlkerung oft ugeholl gëtt.
An deem Zesummenhang hu mir der Regierung dës Froe gestallt:
-
Sinn der Regierung dat genannten Dokument an d’Recherchë vum WDR a BR bekannt?
-
Ass et enger staatlecher Entitéit aus Lëtzebuerg aktuell méiglech, Chatverleef vu Privatpersounen iwwer WhatsApp oder aner Applikatiounen ouni hiert Wëssen ze iwwerwaachen?
Falls jo, ëm wéi eng Applikatiounen handelt et sech? -
Kann d’Regierung ausschléissen, dass eng staatlech Entitéit aus dem Ausland, oder Privatleit d’WhatsApp-Chatverleef vun Deputéierten a Regierungsmemberen iwwerwaache kéinten?
Falls nee, firwat gräift d’Regierung trotzdeem op dëse Messengerdéngscht zeréck fir Kommunikatiounen, déi en rapport mat der Regierungsaarbecht stinn?
QP Nummer 4283
