Biodreifstoff gëtt als Alternativ zu de fossille Brennstoffer gesinn. D’Hierstellung vum Bioethanol ass awer kontestéiert, well ee fir d’Hierstellung Planze wéi Raps, Soja oder och Palmenueleg a grousse Menge brauch. Zu Lëtzebuerg gouf den 1.01.2019 decidéiert, 95er Bensin aus bis zu 10% planzlechem Ursprong ze verkafen. 2020 huet an der EU de Biosprit nëmmen zu Maximal 7% aus dëse Planzen dierfe bestoen. D’Kommissioun huet 2019 decidéiert, dass den Asaz vu Palmenueleg am Bioethanol bis 2030 op Null soll erofgefuer ginn. Si huet festgehalen, dass d’Palmenueleg-Produktioun zu enger Ofholzung vu Bëscher féiert an dofir net als Wee fir d’Ëmsetze vun de Klimaziler dierf benotzt ginn.
An deem Zesummenhang hu mir der Regierung dës Froe gestallt:
-
Wéini gouf hei zu Lëtzebuerg ugefaangen, Sprit ze verkafen, deen deelweis oder ganz aus Bioethanol besteet? Vun deem Moment un bis Enn 2020: wéi vill Kubik Liter Palmenueleg goufen op Lëtzebuerger Tankstelle getankt (opgeschlësselt no Joer)?
-
Viséiert d’Regierung weider Erhéijungen oder eng Verréngerung a Punkto planzleche Komponenten an den Dreifstoffer? Wann jo, wat sinn déi viséiert Prozentsätz vun Ethanol a Bioethanol? Wéi eng planzlech Komponente sollen dobäi zum Asaz kommen?
-
Wéini sollen déi 0% Palmenueleg am Bioethanol zu Lëtzebuerg erreecht ginn?
QP Nummer 3593
