Wéi RTL.lu an engem häitegen Artikel beriicht, soll ee Gemengeconseiller aus der Gemeng Käl/Téiteng engem Gemengebeamten aus der nämmlechter Gemeng per Bréif opgefuerdert hunn, fir him 2000€ z’iwwerweisen, dëst no engem klengen Intermezzo tëschent deenen zwou Persounen. De Gemengeconseiller huet dëse Bréif un d’Gemengeverantwortlech – also de Buergermeeschter, adresséiert. Et stellen sech deontologesch Froen, well hei net just zwou Privatpersounen ee Konflikt haten, mee ee Gemengeconseiller an een Gemengeaarbechter. D’Gemengegesetz schreift dem Gemengerot Kompetenzen am Beräich vum Personal zou (Artikel 30 vum Gesetz) a kontrolléiert och d’Personalpolitik vun enger Gemeng (zum Beispill iwwert den Artikel 28 vum Gesetz).
An deem Zesummenhang hu mir der Regierung dës Froe gestallt:
Ass ee Gemengeconseiller a gewësser Aart a Weis als Patron vum Gemengenaarbechter unzegesinn?
Wéi ass d’Aktioun vum Gemengeconseiller ze bewäerten?
Ass de Minister der Meenung, dass d’Fuerderung vum Gemengeconseiller een Abus de Pouvoir duerstellt?
Ass de Minister der Meenung, dass d’Fuerderung vum Gemengeconseiller een Erpressungsversuch duerstellt?
QP Nummer 2504
