Warning: Undefined array key "options" in /var/www/vhosts/piraten.lu/httpdocs/wp-content/plugins/elementor-pro/modules/theme-builder/widgets/site-logo.php on line 124
D’Versuergungssécherheet bei der Energie muss méi ee grousse Stellewäert kréie wéi dat bis elo de Fall ass. D’Invasioun vun der Ukrain souwéi d‘Dréchente wärend dem Summer 2022, wou vill Atomkraaftwierker a Frankräich kee Stroum méi konnte produzéieren, hu gewisen, wéi schnell Energie als Waff kann agesat ginn a wéi ofhängeg d‘Leit vun den Energiepräisser sinn. Mir mussen dofir esou wäit a schnell wéi méiglech vu fossillen an nuklearen Energiequelle wechkommen. Fir d’Piraten leit d‘Léisung do dran, dass mer esou schnell wéi méiglech nohalteg Energien ausbauen an eng dezentral an diversifizéiert Approche beim Beschafen, Erzeugen a Verdeele vun Energie aféieren.
Lëtzebuerg produzéiert aktuell pro Joer ronn 1,3 Terrawattstonne Stroum a verbraucht ronn 6,5 Terrawattstonnen. Zu Lëtzebuerg ginn et ronn 150.000 Wunngebaier, deenen hier Diecher potenziell brauchbar wieren, fir eng Photovoltaikanlag vu 10 Kilowattpeak.
Eist Zil muss et si fir hei am Land genuch erneierbare Stroum ze produzéieren an domat laangfristeg eppes géint d’Energieaarmut, Energieonofhängegkeet a fir de Klimaschutz ze maachen an zousätzlech Aarbechtsplazen an der Energie-Branche ze schafen. Wa mer et fäerdeg bréngen, nëmme 5% vun de bebauten a versigelte Flächen (Diecher, Parkingen, etc.) zu Lëtzebuerg mat Solarpanels ofzedecken, kéinte mer bal aacht Quadratkilometer Solarpanels opstellen. Domadder kéint een all d’Gefierer aus dem nationale Fuerpark mat Stroum versuergen. Wa mer souguer 15% vun där Fläch kéinten notzbar maachen, da kéint Lëtzebuerg eleng duerch Solarenergie energieautark ginn.
D’Piraten:
An der Äntwert op parlamentaresch Froe krute mer erkläert, dass op nëmme 40 Gebaier beim Staat Photovoltaikanlagen installéiert sinn an 19 Gebaier Solarthermieanlagen hunn, wat un der Unzuel vun de Gebaier ongeféier 4 % vu ronn 1.500 Gebaier entsprécht.
Mir Piraten wëllen:
Nuklear Energiequellen si keng Alternativ zu fossillen Energien: Atomkraaft ass knaschteg a geféierlech fir Mënsch, Déier an Natur. Ee klengen Accident huet Konsequenzen, déi iwwer Generatiounen ewech net méi réckgängeg gemaach kënne ginn. Et ass eng onsécher an am Endeffekt och eng Deier form, fir Energie hierzestellen. Atommeileren z’ënnerhalen an no hirer Liewenszäit ofzemontéiere kascht d’Steierzueler:innen richteg vill Geld, wärend d’Betriber mat Subventioune Milliounen u Profitter maachen. Bei Dréchente besteet iwwerdeems de Risiko, dass och Atomkraaftwierker keng Energie méi produzéieren (siehe Frankräich am Summer 2022)
D’Piraten:
All Energiequell, déi nohalteg an illimitéiert ka genotzt ginn, wéi zum Beispill de Wand, d‘Sonn oder d’Waasser, ass eng positiv Energiequell. Laangfristeg profitéiere mer vun dësen Energien, well se onendlech kënne genotzt ginn an ouni iergendwellech Offallprodukter an eiser Ëmwelt ze hannerloossen.
D’Piraten sinn oppen:
Grondleeënd Infrastrukturen a Servicer, wéi zum Beispill d’Réier fir Drénkwaasser, Ofwaasser a Reewaasser, Leitunge fir d’Elektresch, Telekommunikatioun a Fernwärme, d’Stroossen- an d‘Schinnenetz an d’Gestioun vum Offall a Recycling wäerte mat de Piraten net privatiséiert ginn, mee an der Hand vum Staat, de Gemengen oder de Gemengesyndikater bleiwen. Domadder gëtt garantéiert, dass d’Infrastrukture laangfristeg dem ëffentlechen Interessi déngen.
Lëtzebuerg importéiert aktuell ee Groussdeel vu sengem Stroum aus dem Ausland an dat wäert mëttelfristeg net änneren, ausser mir bréngen et duerch de massiven Ausbau vun den erneierbaren Energien fäerdeg, fir selwer energieautark ze ginn. Fir erneierbare Stroum aus de verschiddensten Energiequellen heihinner ze kréien, brauche mir Héichspannungsgläichstroumiwwerdroungs-Leitungen (kuerz HGÜ). Dës Leitungen géifen eis erlaben déi néideg Netzstabilitéit z’erreechen duerch d’Ubanne vu Produktiouns- a Späichercapacitéiten, déi méi wäit vu Lëtzebuerg ewech sinn. Donieft ass d’Capacitéit vu Leitunge méi héich, sou dass als Nieweneffekt bestoend Trasse benotzt a keng weider Trasse musse geluecht ginn.
D’Piraten wëllen:
Fir d’Notzung vun eisem Stroum intelligent ze lenken a fir all d’Méiglechkeete vu Spuerpotenzialer a Synergien ze notzen, ass et sënnvoll, fir sougenannte Smart Grids, also intelligent Stroumnetzer, anzeféieren. Duerch Smart Grids kann ee Stroumnetz sech u sech selwer reguléieren an optimiséieren. Wann d’Leit an enger Residence hier Elektroautoen all ugeschloss hunn, kann de Reseau kucken, wéi en d’Energie verdeelt. D’Netz rechent aus, ob et méi Sënn mécht, fir dee Moment Stroum aus der Solaranlag ze huele fir den Auto ze lueden oder fir en um Marché ze verkafen. Och ëmgedréint kéint de Stroum aus der Autosbatterie genotzt ginn, fir zum Beispill den Uewen oder d’Heizung am Appartement ze fidderen: der Notzung sinn u sech ab deem Moment keng Grenze méi gesat.
D’Piraten:
De Krich an der Ukrain souwéi d’Dréchenten am Summer 2022 hu gewisen, dass mer zu all Moment musse prett sinn, fir eis Energieversuergung ze garantéieren. Déi dofir reservéiert Fonge mussen esou wäit wéi noutwenneg erhéicht gi fir d’Infrastruktur vum Land ze stäerken an d’Konsequenze vun engem Ausfall op Mënsch a Wirtschaft ze limitéieren.
Fir d’Piraten ass kloer:
Aktuell sinn d’ëffentlech Luetstatiounen (Chargy) nëmme begrenzt verfügbar. Op ville Plazen hei am Land ginn d’Kapazitéite vum Netz net duer, fir méi Luetstatiounen an de Stroossen opzebauen, ob privat oder ëffentlech. Lëtzebuerg huet och jorelaang vum Tanktourismus
profitéiert, ouni, dass dovunner ee Su an d’Nohaltegkeet vun eisem Tankstellennetz gaangen ass. Nëmme mat engem gudde Ladenetz maache mer d’Elektromobilitéit méi attraktiv fir d’Leit.
D’Piraten wëllen:
Mir Pirate wëlle kleng Servicer wéi eis Handwierksbetriber stäerken an och de Secteur Climatetech encouragéieren op Lëtzebuerg ze kommen. Ënnert Climatetech falen zum Beispill Solaranlagen an allen Formen, (Mikro)Wandrieder a Carbon capture.
Domat erwëscht een zwou Mécke mat enger Klapp wëll een eng Léisung fir d’Klimakris weiderdreift an nohalteg Aarbechtsplaze schaaft. Fir Solaranlagen ze bauen, brauche mir qualifizéiert Handwierker. Mir ginn dovun aus, dass fir den Bau vu Solaranlagen duerch eise Programm Sunergy ronn 400 zousätzlech Aarbechter:innen gebraucht wäerte ginn. Een Deel vun dëse Leit mussen natierlech duerch fir de Bau vu Solaranlage geschoult ginn.
Dofir si mir Pirate fir ee klimafrëndleche Wirtschalsstanduert deen:
An de leschte Joren hu verschidden Etüden erausfonnt, dass d’Reduktioun vun de CO2- Emissiounen eleng net méi duer geet, fir eist Klimazil vu maximal 1,5 Grad Äerderwiermung z’erreechen. Parallel zur Reduktioun vun den Zäregaser mussen also och Ustrengungen ënnerholl ginn, fir de bestoende CO2, deen elo schonn an der Atmosphär ass, eraus ze kréien. Mir schwätzen heibäi vum Carbon Capture oder negativen Emissiounstechnologien.
Beim Carbon Capture geet et dorëm, fir de CO2 aus der Loft eraus ze filteren an an anere Forme fest ze setzen, wou en dann net méi zur Äerderwiermung bäidréit. Da kann ënnert verschiddene Forme sinn: a Steeschichten oder a Baumaterialie wéi dem Bëtong. Et existéiert och d’Méiglechkeet fir d’Hierstellung vun E-fuels. Dës Dreifstoffer sinn op mannst CO2-neutral an eegnen sech, fir den Undeel vu fossillen Dreifstoffer kuerz- a mëttelfristeg nach ee Mol ze reduzéieren.
D’Piraten:
Zënter der Entdeckung vum Feier an duerno der Erfannung vun der Glübieren si mir Mënsche Meeschter doriwwer, wéini et hell soll sinn a wéini et donkel ass. Dat war vun der Natur natierlech net esou beofsichtegt. An haut wësse mer, dank der Fuerschung aus der Medizin a Psychologie, dass d’kënstlech Luucht d’Auswierkungen op d’Gesondheet vu Mënsch, Déier an Ëmwelt huet.
Et muss net all Plaz permanent beliicht ginn. Kënstlech Luucht muss virun allem op deene Platze sinn, wou et Sënn mécht, wéi zum Beispill op Aarbechtsplazen, op vill befuerene Kräizungen oder iwwer Zebrasträifen. Do wou d’Luucht net permanent gebraucht gëtt, kënne mer Suen aspueren.
D’Piraten wëllen eng intelligent Beliichtung:
Mir sinn an enger Klimakris an d’Wunnenge maachen ee groussen Deel vum Energiekonsum an de CO2-Emissiounen hei am Land aus. Duerch d’Hëtze vun eisen Haiser mat fossillen Energië stousse mer all zesummen eng riseg Quantitéit un Zäregaser (dorënner CO2) aus. Wa Wunnenge besser isoléiert sinn, brauch ee manner Energie fir iwwert déi kal Joreszäiten ze kommen. Dofir ass et wichteg a richteg, déi Leit z’ënnerstëtzen, déi hier Wunnengen energeetesch sanéiere wëllen.
Wann d’Haiser besser isoléiert an energieeffizient sinn, spuert eist Land op laang Zäit Ressourcen a mer verbrauche manner Energie. Dat kënnt zu gudder Lescht de Leit, hirem Portmonni an der ganzer Gesellschaft zegutt. Mir belounen a motivéieren d’Leit also, fir energieperfomant ze ginn.
Wann een seng Wunneng renovéiert, kann ee vum niddregsten TVA-Taux vu just 3% profitéieren an domadder bis zu 50.000€ vun der bezueltener TVA zeréckkréien. Ee Beispill: bei enger Rechnung vun 100.000€, misst ee bei 17% TVA 17.000€ dropbezuelen. Duerch déi bëlleg TVA vun 3% leet een awer nëmmen 3.000€ bei. De Staat schenkt engem an dësem Fall also 14.000€. An deem Fall huet ee 14.000€ vu senge 50.000€ opgebraucht.
Déi aktuell Hëllefe ginn nach net wäit genuch, well déi meescht Leit nach ëmmer ee Prêt mussen ophuelen, fir sech d’Renovatioun leeschten ze kënnen. Vill Stéit, déi an de leschte Joren eng Wunneng hei kaf hunn, sinn awer mat hiren Ausgabe fir de Hypothéikenprêt hanne widder. Mir mussen awer elo d’Energiewend ugoen.
D’Piraten setzen sech dofir an, dass jiddereen seng Wunneng ka renovéieren: