Drogepolitik

Een Thema, wat hei zu Lëtzebuerg dacks net gär ugeschwat gëtt, ass d’Drogeproblematik. Mat Droge verbanne vill Leit just klischeehaft Virstellunge vu kriminellen Drogendealeren a Sans-Abrisen. Dës Virstellungen entspriechend awer net ganz der Realitéit. D’Drogeproblematik hei zu Lëtzebuerg ass vill méi villfälteg wéi dës deels falsch Virstellungen an deem muss politesch och Rechnung gedroe ginn. Nëmmen esou kann sech un der Situatioun wierklech eppes änneren.

Méi Präventioun a Sensibiliséierung

Vill Problemer mat Droge kéinte verhënnert ginn, wann vill méi fir eng gutt Präventioun gemaach géif ginn. Eng konsequent Opklärungs- a Suchtpräventiounsaarbecht ass de Grondstee vun enger moderner Drogepolitik.

D´Piraten fuerderen an dësem Kontext:

Eng Sensibiliséierung déi bei de Kanner an der Schoul ufänkt, wou een net nëmmen op d´Geforen hiweist, mee och doriwwer informéiert, dass ee mat Droge keng Problemer ka léisen;
Eng Sensibiliséierung iwwert d´Gefore vum Alkohol, déi iwwert Initiativë wéi «Dry January» erausgeet;
Eng obligatoresch Formatioun am Kader vun der zweejäreger Proufzäit fir den definitive Führerschäin virgesäit.

Géint Klischeeë virgoen

Dass vill Drogekonsumenten net den traditionelle Virstellunge vu vill Leit entspriechen, ass eppes, wat seelen thematiséiert gëtt. Grad d’Analyse vum Ofwaasser weisen awer, dass an de Wirtschaftszentren d’Konzentratioun vun de Réckstänn am Waasser mat am héchsten ass. Dowéinst ass et wichteg, dass den Dialog iwwert d’Drogeproblematik éierlech gefouert gëtt. Nëmmen esou kann een de Problem wierklech bei der Wuerzel packen.

Drogenofhängegkeet als medezinesche Problem gesinn

Drogenofhängeg Persounen si krank an dierfen net méi wéinst hirer Krankheet kriminaliséiert ginn. Dës Krankheet soll behandelt ginn, ouni dass déi ofhängeg Persoun muss fäerten, fir hir Sucht och nach penal bestrooft ze ginn. Eng Kriminaliséierung stéisst déi betraffe Persoune just nach méi an d’Prekaritéit. Och opgrond vun dëser Angscht verzichten ofhängeg Persounen nach ze dacks op eng Behandlung.

Dofir fuerderen d´Piraten:

Eng proaktiv Propose vun alle verfügbare medezinesche Méiglechkeete fir Persoune mat engem Suchtverhalen;
Eng méi grouss Offer u sozialen Agliederungsmoossnamen, déi enger Persoun et erméiglechen, sech nees eng sécher an drogefräi Existenz opzebauen an esou Réckfäll an d’Sucht ze vermeiden.

Méi spezialiséiert Strukturen

Lëtzebuerg brauch méi Strukturen, bei deenen sech ofhängeg Persounen kënnen Hëllef sichen. Eng Persoun muss sech zu all Moment un eng vun dësen Statiounen wende kënnen, fir en Entzuch unzefänken.

Dofir fuerderen d´Piraten:

Méi Fixerstuffen mat enger professioneller Berodung duerch spezialiséiert Personal, wou d’Leit an enger gréisst méiglecher Sécherheet kënnen consomméieren;
Méi Statiounen a Spideeler, wou ofhängeg Persounen sech kënnen hi wenden, fir een Entzuch ze maachen, begleet vu qualifizéiertem Personal, dat hinnen am Kader vun den Entzuchserscheinungen an domat verbonnene Problemer kann hëllefen;
Méi Programmer, déi Persounen no hirem Entzuch begleeden an hinnen dobäi hëllefen, hire Wee zréck an een drogefräit Liewen ze fannen a méiglech Réckfäll ze vermeiden.

Gläichstellung vu medezineschem Cannabis mat anere Medikamenter

Zu Lëtzebuerg ass d’Verschreiwung vu medezineschem Cannabis zënter véier Joer méiglech. Trotzdeem sinn dës Medikamenter nach ëmmer net komplett mat de gängege Medikamenter gläichgestallt. Medezinesche Cannabis kritt e Patient am Moment just an enger Spidolsapdikt.

D´Piraten fuerderen an dësem Kontext:

Eng Gläichstellung vu cannabinoidhalteg Medikamenter mat anere verkéiersfähege Medikamenter;
Eng Offer déi et erlaabt, dass Patienten hir cannabinoidhalteg Medikamenter och sollen an Apdikten uechter d’Land kënne kréien;
Eng Vergréisserung vum Stock, esou dass zu all Moment genuch cannabinoidhalteg Medikamenter disponibel sinn.

D’Legaliséierung vum Besëtz vu Cannabis

Fir volljäreg Persoune muss de Besetz vu Cannabis endlech legaliséiert ginn. Zënter Jore schleeft de Projet, mee nach ass kee Resultat do. Hei muss nogebessert ginn. Mat der Legaliséierung vum Cannabis entkriminaliséiert ee ganz vill Leit an och d’Police gëtt entlaascht.

Drogepolitik

Inhalt

Drogepolitik

Méi Präventioun a Sensibiliséierung

Géint Klischeeë virgoen

Drogenofhängegkeet als medezinesche Problem gesinn

Méi spezialiséiert Strukturen

Gläichstellung vu medezineschem Cannabis mat anere Medikamenter

D’Legaliséierung vum Besëtz vu Cannabis

Piratepartei

D'PIRATEN an der Chamber