D’lescht Joer hat d’Sécherheetsfirma Protection Unit hir Aktivitéiten zu Lëtzebuerg iwwerraschend agestallt, wouduerch, ënnert anerem, d’Sécherheetspersonal bei den CFL direkt betraff war, obwuel nach kuerz virdrun – am Februar – en neie Kontrakt opgestallt gouf. An dësem Kontext hat ech schonn a menger parlamentarescher Fro n°1906 op dës Problematik higewisen.
Zënter dem Summer 2025 gëtt de Gardiennage bei den CFL vun der Firma Brinks duerchgefouert, woubäi d’Personal zum Deel vu Protection Unit iwwerholl gouf. No mengen Informatiounen besteht beim Personal no dësem Iwwergang, och no méi wéi engem Joer, eng grouss Ongewëssheet, besonnesch wat d’Aarbechtsstabilitéit an déi perséinlech Zukunftsperspektiven ugeet.
Am Kontext vu rezente Gewaltvirfäll am ëffentlechen Transport ass et wichteg, datt d’Sécherheetsleit, déi alldeeglech fir d’Sécherheet vu Passagéier an CFL-Personal schaffen, eng Gewëssheet fir hir Zukunft kréien.
An deem Zesummenhang hu mir der Regierung dës Froe gestallt:
-
Wéi vill Sécherheetsagent:innen vu Protection Unit goufe virun der Iwwernam duerch Brinks fir d’CFL agesat?
-
Wéi vill Leit goufe vu Brinks iwwerholl a wéi vill kruten een CDI a Vollzäit?
-
Wéi vill Persoune goufen net zu de viregte Bedingungen iwwerholl, a wat waren d’Grënn?
-
Wéi hunn sech zënter der Iwwernam duerch Brinks d’Iwwerstonnen, d’Krankeschäiner, den Absenteismus an d’Personalfluktuatioun am Gardiennage entwéckelt?
-
Wier et rechtlech méiglech, datt d’CFL direkt Sécherheetsleit ënnert eegenen CFL-Konditiounen astellen, an net iwwer eng extern Sécherheetsfirma? Falls jo: firwat gëtt dës Optioun net ëmgesat?
-
Ass scho bekannt, wien no deene provisoreschen 9 Méint de Gardiennage bei der CFL fir déi nächst véier Joer iwwerhëlt?
QP Nummer 3654
