An de leschte Joren hëlt d’Zuel vun de E-Scooteren am ëffentleche Stroosseverkéier staark zou. An der Äntwert op meng vireg Fro n°2608 hat Mobilitéitsministesch erkläert, datt d’E-Scooteren am Code de la Route definéiert wieren an ënnerscheet gëtt tëschent Gefierer, déi als Micro-véhicule électrique gëllen, oder an d’Kategorie vum 50-Kubikmoto (50cc) falen. Et ass eng positiv Entwécklung, allerdéngs ass et och esou, dass vill Leit d’Gefierer ouni Helm, ouni Führerschäin oder Kenntnisser vun de Stroossereegelen notzen. D’Ministesch schreift dozou: “Genee wéi um Vëlo, ass aus Sécherheetsgrënn vum Ministère recommandéiert en Helm unzedoen, mee dëst ass net obligatoresch.” Dëst féiert oft zu geféierleche Situatiounen, besonnesch wann E-Scooteren onerwaart op d’Strooss fueren oder d’Virfaart huelen. Et existéiert aktuell kee System fir d’Immatrikulatioun oder d’Versécherung vun de Gefierer, grad wann et sech ëm Micro-véhicules handelt.
An deem Zesummenhang hu mir der Regierung dës Froe gestallt:
Wéi vill Accidenter mat E-Scootere goufen an de leschten dräi Jore vun der Police enregistréiert, a wéi héich war dobäi d’Zuel vu Blesséierten oder materielle Schied?
Gedenkt d’Regierung, Verkéiersschoulungen, fir Fuerer vun E-Scooter ze maachen (z.B. ab 13 Joren), fir d’Verkéierssécherheet ze verbesseren?
“Fir de Leit dat awer nach emol an Erënnerung ze ruffen, wäert analyséiert ginn ob eng vun den nächste Sensibiliséierungscampagne sech ëm Sécherheet vun den E-Scooteren dréie kéint.” Wéini wäert eng Sensibiliséierungscampagnen zum Thema E-Scooter gemaach ginn?
Wéi steet d’Ministesch zur Iddi, fir ee System anzeféiere fir d’Immatrikulatioun vun E-Scooteren, fir am Fall vun Accidenter eng kloer Haftungsbasis ze schafen?
QP Nummer 3199
