An de leschte Méint hunn sech d’Plainte vu Bierger iwwert déi extrem schlecht Erreechbarkeet vun der Caisse nationale d’assurance pension (CNAP) gehäift. Vill Persoune bekloen sech, dass et quasi onméiglech ass, telefonesch un d’CNAP ze kommen, E-Maile systematesch onbeäntwert bleiwen oder souguer ageschriwwe Bréiwer respektiv E-Recommandéë, déi mat zousätzleche Käschte verbonne sinn, net ugeholl ginn.
Dës Situatioun ass besonnesch problematesch, well et sech ëm eng ëffentlech Verwaltung handelt, déi wichteg Leeschtunge geréiert a mat där d’Bierger mussen dacks dréngend Froen oder Problemer kläre kënnen.
An deem Zesummenhang hu mir der Regierung dës Froe gestallt:
-
Kann d’Ministesch méi detailléiert iwwert dës systematesch an unhalend Kommunikatiounsproblemer bei der CNAP informéieren?
-
Wéi erkläert d’Ministesch, dass souguer ageschriwwe Bréiwer oder E-Recommandéë vu Bierger net ugeholl ginn?
-
Wéi eng konkret Moossname gedenkt d’Ministesch ze huele fir d’Erreechbarkeet an d’Reaktivitéit vun der CNAP ze verbesseren?
-
Gëtt et Pläng fir zousätzlech Personal anzesetzen oder d’intern Prozeduren ze optimiséieren?
-
Wéi gedenkt de Ministère sécherzestellen, dass d’Bierger an Zukunft bannent engem akzeptabelen Delai eng Äntwert op hir Ufroe kréien?
QP Nummer 3018
