Police

Sécherheet & Uerdnung: Police

Ouni Sécherheet gëtt et an enger Gesellschaft keng Fräiheet. Dofir ass et ee Muss, dass de Staat, duerch seng Police a Justiz, alles mécht, fir d’Sécherheet esou héich wéi méiglech ze halen, dass d’Leit hir Grondfräiheeten kënnen ausliewen. De Staat muss dofir suergen, dass d’Leit sech sécher spieren, andeems se sou gutt wéi méiglech viru Mënschen mat béisenOfsiichten a Gewalt geschützt sinn. D’Bierger:inne musse bei der Sécherheet am Mëttelpunkt stoen: hier Fräiheeten an hiert Wuelergoen musse geschützt ginn. D’Piraten sti fir eng Sécherheetspolitik, déi pragmatesch a proportional zum Zilsoll sinn. Mir schaffen op Léisungen, déi noweislech d’Sécherheet vun de Leit solle verbesseren.

Méi physesch Policepresenz

Kee sollt an Angscht musse liewen an a kriddelege Situatiounen op sech eleng gestallt sinn. An eisen Aen ass déi beschte Léisung, fir d’Sécherheetsgefill hei am Land z’erhéijen, méi physesch Policepresenz op eise Stroossen an ëffentleche Plazen. D’Police muss net iwwerall an zur selwechter Zäit sinn: et geet duer, dass mer genuch Polizisten hunn, déi fir een do sinn, wa se gebrauch ginn.

D’Pirate wäerten:

Iwwert déi nächst Joren honnerten nei Polizist(inn)en astellen, fir dem Bevëlkerungswuesstem hei am Land gerecht ze ginn;
A Problem-Quartiere méi Police-Patrullen zesumme mat Gemengebeamt(inn)en a Streetworker reegelméisseg zirkuléiere loossen, déi mat hirer Presenz fir Uerdnung a Sécherheet suergen;
A gréissere Gemengen erëm dofir suergen, dass hei op mannst ee Police-Kommissariat 24/7 fir d’Bierger:innen op ass.

D‘Police um Terrain entlaaschten

Et geet net nëmmen duer, dass mer méi Polizist(inn)en astellen, mee mir mussen och dofir suergen, dass d’Polizist:inne méi Zäit hunn, fir och tatsächlech um Terrain ze schaffen. Aktuell ass dat awer net de Fall: d’Polizist:inne verléiere vill Zäit beim Schreiwe vu Protokoller an Dokumenter a këmmeren sech ëm Aufgaben, déi net fir méi Sécherheet suergen. Wann d’Police méi Zäit hunn, kënnen si sech méi ëm richteg Policeaufgaben, wéi d’Feststelle vu Strofdoten an d’Ermëttlung (Enquête) këmmeren.

D’Pirate wäerten d’Police entlaaschten, andeems:

Aufgaben, déi net vun der Police gemaach musse ginn, op aner Verwaltungen ausgelagert ginn. (Zum Beispill soll den Arrestantentransport an Zukunft vun de Giischtercher gemaach ginn an d’Gemengebeamt(inn)e sech ëm kleng Delikter këmmeren.);
Administrativ Aufgabe bei der Police vun zivillem Personal iwwerholl ginn a verschidde Saachen net méi eng Policepresenz brauchen (zum Beispill d’Ausfëlle vu Constate bei klengen Autosaccidenter);
Mir d’Digitaliséierung bei der Police endlech ufänken, mat Tabletten an Equipementer, op deenen d’Polizist(inn)en all hir Aufgaben digital erleedege kënnen;
Mir duerch d’Cannabis-Legaliséierung an eng nei Drogepolitik der Police nei Prioritéite ginn, fir dass se méi Zäit hunn, fir déi richteg geféierlech Kriminell opzesichen a viru Geriicht ze bréngen;
Mir d’Kompetenzen tëschent der Police an der Politik (Gemengen, Ministèren) kloer opdeelen an trennen. Verschidden Aufgaben, wéi d’Festleeë vun engem Sécherheetsperimeter oder d’Détention préventive administrative, sollen an Zukunft ouni Autorisatioun vum Minister/vun der Ministesch oder dem Buergermeeschter/der Buergermeeschtesch kënne vun der Police gemaach ginn. Wann eng Gefor besteet, muss d’Police ouni bürokratesch Hindernisser kënne reagéieren.

D‘Police muss een attraktive Patron sinn

D’ëffentlech Sécherheet an de Rechtsstaat garantéieren, dat sinn d’Käraufgabe vun engem Staat an dofir brauch de Staat gutt Polizist:innen. Dat ass eng grouss Verantwortung fir all eenzelne Polizist.
De Beruff ass aus deem Grond keen einfachen: oft ass een den Überbringer vu schlechten Noriichten, et muss een a ville kriddelege Situatiounen d’Rou behalen an dobäi kommen dann nach onreegelméisseg Schaffzäiten a Beruffsrisiken.
Dobäi kënnt, dass zënter der Police-Reform intern Streidereie lassgaange sinn, well den aktuelle Karriäresystem fir Diskussioune suergt an net fair opgestallt ass.

D’Pirate wëllen a punkto Attraktivitéit vun der Police:

Déi ganz Karriär an de Primmesystem bei der Police & Arméi, zesumme mat de Acteuren, iwwerschaffen. D’Gewiichtung vun de Karriäre soll op der Ausbildung an Erfarung leien. Et muss awer och jidderengem méiglech sinn, d’Karriäreslieder no transparente Krittären, Tester an Eegenefforten eropzeklammen;
Eng Police-Crèche aféieren, fir den onreegelméissegen Auerzäite vun der Police Rechnung ze droen. Dës Crèchë kënnen och op aner Beruffer, déi Schichte schaffen, ausgewäit ginn;
D’Formatioun vun de Polizist:innen erëm op mindestens zwee Joer verlängeren, éiert d’Polizist:innen eleng op den Terrain geschéckt ginn.

Ëffentlech Sécherheet nëmme mat der Police: keng privat Sécherheetsfirmen

D’Polizist:inne schützen eise Rechtsstaat, andeems si dofir suergen, dass jidderee sech un d’Reegelen hält. Dofir vertraue mir der Police de Gewaltmonopol un, wat eng ganz grouss Verantwortung fir all eenzel Polizist:in ass.

D’Piraten:

Schwätzen sech kloer dogéint aus, dass privat Sécherheetsfirmen sech ëm d’Sécherheet am ëffentleche Raum këmmeren;
Mat de Pirate bleift d’Organisatioun vun der ëffentlecher Sécherheet eng Aufgab vun der Police!

Gemengebeamten stäerken aplaz Kommunalpolice

D’Pirate mengen net, dass d’Aféierung vun enger sougenannter „Kommunalpolice“ de richtege Wee ass, dee fir méi Sécherheet an eise Gemenge suergt. D’Gendarmerie gouf viru Joerzéngten ofgeschaaft – firwat also erëm ee Waasserkapp un neie Verwaltunge schafen? Dës Weidere stellt sech d’Fro, wou déi Leit fir eng Kommunalpolice sollen hierkommen a bezuelt ginn, wa scho bei der Police d’Personal feelt.

Déi besser Alternativ ass, fir der Police an de Gemengebeamten déi personell, materiell an organisatoresch Mëttelen ze ginn, déi se brauchen, fir d’Strofverfollegung ze verbesseren;
D’Pirate setzen sech dofir an, dass d’Gemengebeamten hir Kompetenze voll notze kënnen a Presenz weisen, fir dass sech un d’Gesetzer an d’Reglementer gehale gëtt.

Videoiwwerwaachung ass keen Zaubermëttel

Säit Jore gëtt d’Videoiwwerwaachung a verschiddene Gemengen hei am Land ausgebaut, obwuel Etüden an d’Erfarungen um Terrain kloer weisen, Dass et kee Sécherheetsgewënn duerch eng generell Videoiwwerwaachung gëtt.

D’Pirate setzen sech dofir an:

Dass d’Videoiwwerwaachung net als Zaubermëttel fir d’Garantéiere vun der ëffentlecher Sécherheet mëssbraucht gëtt. Mir wäerten eis prioritär fir Léisungen asetzen, wou d’Polizist:innen an der Uniform oder mat geziilten technesche Mëttele fir méi d’Sécherheet suergen;
Dass Videoiwwerwaachungsprogrammer, déi aktuell a verschiddene Gemenge genotzt ginn (wéi zum Beispil de VISUPOL), reevaluéiert a falls néideg gestoppt ginn.