Europa & Groussregioun

Méi Groussregioun = besser Liewensqualitéit fir jiddereen

Lëtzebuerg lieft Europa all Dag an der Groussregioun. All Dag kommen däitsch, franséisch a belsch Noperen eriwwer schaffen. Vill Lëtzebuerger:innen hunn an der Groussregioun ausserhalb vun de Grenzen eng nei Heemecht fonnt oder ginn d’Weekender op Tréier, Metz, Nancy, Namur oder Bastogne. Vill Studenten zitt et an d’Nopeschstied ronderëm Lëtzebuerg.
Europa a Schengen ginn an der Groussregioun gelieft. D’Piraten wëllen sech dofir asetzen, dass d’Liewensqualitéit an der ganzer Groussregioun besser gëtt, andeems méi zesummegeschafft gëtt, méi gemeinsam Projete gestart ginn. Et geet net duer, fir nëmme Suen an den Transportberäich z’investéiere fir Zich ze kafen, Quaien ze verlängeren a Parc & Riden z’amenagéieren. All d’Awunner:in soll méi vun den ëffentlechen Infrastrukturen an de véier Länner kënne profitéieren, ob bei der Santé, beim Transport, bei der Police a bei der Kultur.

D’Piraten setzen fir eng staark Groussregioun an:

Fir méi Méiglechkeeten op Home Office fir Grenzgänger, wat der Liewensqualitéit zu Lëtzebuerg zegutt kënnt, well eist Stroossennetz da manner belaascht gëtt;
Mam Opstelle vun engem groussregionale Fong fir gemeinsam Projeten am Grenzgebitt, deen d’Liewensqualitéit op béide Säite vun der Grenz verbessere soll an dee kloer Krittären fir eng gemeinsam territorial Approche virgëtt;
Mat der Aféierung vun der Rétrocession fiscale nom Modell, wéi en zënter 50 Joren tëschent der Schwäiz a Frankräich gemaach gëtt oder wéi Lëtzebuerg en aktuell mam Fonds Reynders an der Belsch mécht;
Fir méi Investitiounen an d’Sécherheet an den Opbau vun enger eenheetlecher Strategie fir d’Kriminalitéitsbekämpfung an der ganzer Grenzregioun
Eng besser Notzung vun de medezineschen Infrastrukturen a Personal an der ganzer Groussregioun;
Fir méi gemeinsam Projeten fir d’Awunner vun der Groussregioun, ob am kulturelle Beräich, bei den Infrastrukturen oder och am Beräich vum Wunnengsbau.

Méi Demokratie fir d‘EU-Institutiounen

Mir Piraten sinn a bléiwe Pro-EU. Mee mir sinn der Meenung, dass d’europäesch Institutioune musse méi demokratesch an transparent ginn. Am aktuellen EU-Gesetzgebungsprozess dominéiert d’EU-Kommissioun op Käschte vum europäesche Parlament d’Legislativen.

Mir Piraten wëllen:

Eng Ännerung vun der Muechtverdeelung an den europäeschen Institutiounen erreechen, déi d’Legislativ begënschtegt an dem EU-Parlament méi Muecht gëtt;
Eng EU déi zu gemeinsame Wäerter steet. Dofir ass an eisen Aen een Rechtsstaatlechkeetsmechanismus onerlässlech. Ee Land ewéi Ungarn, wat sech net méi un d’EU Wäerter hält an Decisiounen op EU Niveau blockéiert, dierf keen Geld méi aus EU-Fonge kréien. Ee Land, wat Minoritéiten ënnerdréckt an d’Gewaltentrennung net respektéiert, dierf keen Geld vun der EU méi kréien.
Dofir fuedere mir Piraten, dass:
D’EU-Kommissiounspresident:in muss direkt an den Europawalen gewielt ginn;
D’EU-Parlament muss och endlech déi voll Muechte vun engem Parlament kréien. Dozou gehéiert d’Initiativrecht fir Gesetzesproposë kënnen ze deposéieren an d’Recht iwwert den EU-Budget z’entscheeden;
D’Bierger:inne mussen iwwert de Wee vun thematesche Referenden méi agebonne ginn;
D’Konsultatiounen déi d’Kommissioun haut mëscht, erreschen leider wéineg Bierger:innen a méi Interressevertrieder;
D’Leit sollen esou wäit wéi méiglech duerch digital Moyenen an den Alldag vun den EU Institutiounen agebonne ginn;
Een komplett Transparenzregster fir all Treffen vun all Europa Deputéierten, EU-Kommissär:innen an hire Mataarbechter:innen.

Stäerkung vum Matsproocherecht vun de Bierger:innen

D’Konferenz fir d’Zukunft vun Europa war een éischten a wichtegen Exercice, dee gewisen huet, dass ee kann d’Bierger:innen an Entscheedungen op EU-Niveau matabezéien. D’Bieger:innen hunn kloer Proposen ausgeschafft a sinn zefridden aus dem Exercice eraus gaangen. Elo läit et awer un de Memberstaaten, fir d’Recommandatioune vun der Konferenz ëmzesetzen, respektiv de Leit verständlech ze kommunizéiere firwat net, an déi nächst Biegerbedeelegungsprojeten ze lancéieren.
Och suergt een Abanne vun de Leit dofir, dass d’Politikverdrossenheet an d’Anti-EU Stëmmung an den eenzele Länner net weider klëmmt. Hei gëllt et generell méi a méi liicht verständlech ze kommunizéieren, wat d’EU alles fir d’Bierger:inne mécht.

Dofir fuerderen d’Piraten:

Ee konstanten Austausch tëscht de Bierger:innen an de Responsabelen an den EU Institutiounen;
Een zentralen Tool, wou d’Bierger:inne kënnen hir Meenungen ausdrécken a Gehéier fannen;
Méi liicht verständlech Kommunikatioun vun den EU-Institutiounen;
Bei besonnesch wichtegen Themen soll d’EU-Parlament kënnen decidéieren een EU-wäite Referendum ofzehalen, wou all d’EU-Bierger·inne kënne matmaachen.

Géint Rietsextremismus a Faschismus

Déi nationalistesch Stréimungen an Denkbeweegungen an Europa sinn an de leschte Joren ëmmer méi präsent ginn. Europawäit sinn an deene leschte Joren ëmmer méi riets Politiker:innen a Parlamenter gewielt ginn, mat schwéiere Konsequenze fir d’Zesummenaarbecht an den Zesummenhalt vun der Europäescher Unioun. Mer sinn der Iwwerzeegung, dass et kloer Alternative gëtt zu Iddien, déi op engem Gesellschaftsbild opbauen, dat vun Angscht, Haass a Verzweiwlung definéiert ass.
Et ass un eis, d’Stëmm ze erhiewen an de Mënschen an Europa ze weisen, dass et Alternativen zum Rietspopulismus ginn. Dofir schwätze mir Pirateparteien a ganz Europa eis kloer géint all Form vun Haass an Angschtmaacherei aus. Mer Pirate sinn iwwerzeegt, dass all Mënsch d’Recht huet fair a gläich behandelt ze ginn.
Mer sti fir een Europa, an deem all Mënsch seng Chancë soll kréien, egal wéi eng Hautfaarf, Nationalitéit oder Relioun en huet. Eis Gesellschaft huet d’Rechter vu Minoritéiten ze respektéieren. Mer wäerten eis dofir all Form vun Diskriminéierung widdersetzen an eis Gruppéierungen entgéintstellen, déi d’Mënscherechter ugräifen.

LGBTIQ*-Rechter an Europa stäerken

Diversitéit ass ee vun den zentrale Wäerter vun der Europäescher Unioun. Fräiheet a Gläichbehandlung sollt fir jidder eenzelen, onofhängeg vu Glawen, Relioun oder Weltuschauung, garantéiert sinn. An den Ae vun der Piratepartei sinn ëmmer méi Länner an der Europäescher Unioun um richtege Wee. Sou ass zum Beispill d’Reform vum Bestietnis a groussen Deeler vun der EU schonns Realitéit. Aner Länner, wéi Ungarn, beweegen sech leider an déi komplett falsch Richtung. Gesetzer, déi sexuell Opklärung oder Duerstellung vun der LGBTIQ*-Gemeinschaft begrenzen oder verbidde si fir eis net z’acceptéieren.

Fir d’Piratepartei:

mussen d’LGBTIQ-Koppelen an engem Bestietnis oder engem Partenariat déi selwecht Rechter hunn, wéi aner Koppelen. Dës sollen dann och an alle Länner vun der EU unerkannt ginn.

Nohaltëgkeet als Pilier vum europäesche Semester

D’EU-Kommissioun muss bei hiren Evaluatiounen, déi se de Memberstaaten all sechs Méint zoukomme léisst, net nëmmen op traditionell wirtschaftlech Facteure kucken, mee d’Memberstaaten nach méi staark dozou animéieren an eng gréng an digital Zukunft z’investéieren. Donieft mussen och d’Bierger:innen méi an dëse Prozess agebonne ginn, an d’Prioritéiten an d’Ziler vun der EU kënne matbestëmmen.

Ausbau vun zentralen wirtschaftlechen Sekteuren an der EU

D’Covid-19 Pandemie huet eis gewisen, wéi ofhängeg Europa vu China an anere Länner ass, wann et ëm Masken, Medezin an Impfstoffer geet. Mee net nëmmen do huet Europa eng Ofhängegkeet par Rapport zu totalitären an autoritäre Regimmer geschafft, déi gestoppt muss ginn. Stéchwuert Photovoltaikanlagen, Cybersécherheet, Robotik a 5G.
D’EU muss an zentrale Secteuren, wéi der Gesondheet, der Digitalisatioun an den erneierbaren Energië méi selbststänneg ginn. Esou ass fir eis Piraten zum Beispill den “European Chips Act” ee Schrëtt an déi richteg Richtung. Virun allem kleng Betriber a Start-Ups déi néi Weeër virweisen, sollen hei duerch Programmer wéi InvestEU ënnerstëtzt ginn.
D’EU Institutioune spillen eng Kär Roll, fir dës Projeten z’ënnerstëtzen an dofir ze suergen, dass et zu enger fairer Verdeelung vu Produite kënnt am Fall vun enger Kris, zum Beispill am Fall vun enger Pandemie. Diversifizéierung vu Liwwerketten ass hei fundamental wichteg.

Ausbau vum europäesche Schinnen- a Busnetz

Et ginn nach ze oft bilateral Initiativen tëscht Länner amplaz een EU-wäiten an eenheetleche Plang fir d’Zukunft vun der Schinn. Ee Beispill heifir ass d’Netz vun den Nuetszich duerch Europa, wou Lëtzebuerg ausgegrenzt bléift. Gutt Zuchstrecken a Busstrecken iwwert d’Lëtzebuerger Grenze sinn awer och fir d’Frontaliere vun immenser Wichtegkeet. Et ass am Interêt vun dem Standuert Lëtzebuerg, dass d’Leit déi all Dag op Lëtzebuerg schaffe kommen, méi einfach, méi séier a méi bëlleg kënnen eran an eraus. Doduerch kréien d’Leit wichteg Zäit erëm déi se kënne mat hirer Famill an hire Kolleeg:inne verbréngen.

Den Ausbau vum ëffentleche Schinnenetz, fir den Transport vu Wueren a Mënsche muss besser op EU-Niveau koordinéiert ginn.

EU-Handelsofkommes

Mir Piraten hunn eis géint Fräihandelsaccorden, wéi TTIP, Mercosur an CETA ausgeschwat, wëll mir Sozial- an Ëmweltdumping wëlle verhënneren an eis lokal Produktiounen an der Landwirtschaft souwéi an anere Beräicher wëlle schützen.

EU-Fräihandelsofkommes mat anere Länner sollen an den Ae vun eis Piraten just nach mat Demokratien ofgeschloss ginn.
All Handelsofkommes muss och ënnert der Konditioun entstoen, dass d’Paräisser Klimaofkommes respektéiert an ëmgesat gëtt.

Fräi Beweegung am Schengeraum

D’Iddi vun Europa ass, dass mir als europäesch Bevëlkerung zesumme schaffen a liewen, mam Zil, dass jiddwer Land vun dem ganze Gefüge profitéiert. Europa kann nëmmen effektiv
weiderbestoen, wa mer d’Prinzippie vum Schengener Vertrag (Freizügegkeet an Europa) ënnerstëtzen. Covid-19 huet eis gewisen, wéi wichteg et ass, dass d’Grenzen op bleiwen.
EU-Bierger:innen, déi decidéieren hiert Land ze verloossen, fir sech an engem anerem EU-Land nidderzeloossen, si keng Exceptioun méi. Lëtzebuerg ass scho laang d’Heemescht vu villen EU-Bierger:innen a bleift och haut nach ee Wonschland vu ville Mënschen. An een neit Land wunnen ze goen, ass awer och eng Aventure, déi vill Aarbecht a Kraaft vun de jeeweilege Persoune fuerdert.
All Kéiers, wou een an een anert EU-Land plënnert, stéisst een op onnéideg Hindernisser: d’Versécherung kann net matgeholl ginn, Steckere fir elektronesch Geräter mussen ugepasst ginn, Autoemussen nach eemol duerch e Contrôle Technique, Diplomer gi net unerkannt oder d’Pensioune mussen nei berechent ginn.

Dofir wëlle mir Piraten:

Kloer Kaderen an Zäitfënsteren, en deenen ee Land seng Grenzen dierf zoumaachen an de Schengener Vertrag dierf aussetzen;
Een europäeschen Aktiounsplang fir d’Plënneren oder d’Studéiere vun engem EU-Land an dat anert méi einfach ze gestalten.

Géint illegal Pushbacks

An deene leschte Jore goufen et vill Meldunge vun illegale Praktiken op de EU-Baussegrenzen, déi Mënschen, déi bei eis Asyl ufroe wëllen, sollen ausbremsen. Dës Praktiken, wéi zum Beispill d’Zéie vu Booter zréck an Net-EU-Gewässer, sinn illegal an der EU net würdeg. Recherche vu Journalisten hunn bewisen, dass Frontex a verschidden national Grenzbeamten dës Mënsche probéieren erëm aus der EU raus ze drängen an hei deelweis och Gewalt ugewannt gëtt. Esou zum Beispill bei de Schallwaffen, déi d’griichesch Beamten asetzen, an déi kënnen zu schwéiere Schied um Geheier féieren.
Dofir froe mir Piraten:

D’Pushback-Praktiken direkt op een Enn ze bréngen;
Ermëttlungen an deene Fäll ze lancéieren;
D’Benotzung vun Apparater wéi Tounwaffe géint Zivilisten ze verbidden.

Déi russesch Invasioun vun der Ukrain stoppen

Et ass erëm Krich um europäesche Kontinent, e Krich, dee mir als Matbierger:inne vun der EU esou net méi kannt hunn. D’Ukrain kämpft fir hir Fräiheet wärend Russland probéiert d’Land dem Äerdbuedem gläich ze maachen.

Mir Piraten ënnerstëtzen d’Ukrain vun Ufank un an hire Beméiungen, fir déi russesch Besatzer zréckzedrängen. An der Chamber hu mir all d’Ënnerstëtzungsmoossname fir d’Ukrain matgedroen a mir wäerten dat och weiderhi maachen. Mir Piraten si fir d’Ënnerstëtzung vu Waffenliwwerungen déi net riskéieren de Konflikt eskaléieren ze loossen. Dat bedeit, dass mir géint d’Schécke vu lëtzebuerger Zaldoten, Nuklearwaffen, Laangstreckerakéiten, Minnen, Brandbommen an all anere Waffen déi géint internadonal Traitéë verstousse, sinn. De Krich dierf net duerch esou Waffen eskaléieren.

Am Fall wou et sollt zu Friddensverhandlunge kommen, wëlle mir Sécherungen (zum Beispill Blo Helmer) an der Ukrain opstellen, fir sécher ze stellen, dass de Fridde vun Dauer ass.

D’Ukrain brauch och nom Krich Partner an der Défense. De Krich huet an enger éischter Instanz zu enormer Solidaritéit a ganz Europa gefouert elo geet et drëms de Momentum ze erhalen an och weider als europäesch Länner zesumme géint Russland anzestoen.

Och Lëtzebuerg gouf duerch dëse Krich virun Erausfuerderunge gestallt. Vill Mënschen hunn hire Wee an eis d’Land fonnt op der Sich no Sécherheet. Mir Piraten stinn och weiderhin dofir an, dass dës Leit bei eis opgeholl ginn, egal op aus der Ukrain oder anere Länner wéi Afghanistan, an hei anstänneg behandelt ginn.

Fir eng europäesch Arméi als Garant vu Fridden

D’Piratepartei wëll sech dofir asetzen eng gemeinsam europäesch Verdeedegungsarméi opzestellen. Dës Arméi soll gemeinsam Besoinen definéieren, Sécherheetsanalyse koordinéieren an a Beräicher, wéi dem gemeinsamen Akaf, der Maintenance vun Ausrüstung an der Ausbildung vu Rekrutten, zesummeschaffen.

D’Piraten setzen sech fir méi Kooperatioun an allen Domainë vun der Defense an, ausgeholl d’Nuklearwaffen. Eng Europäesch Arméi géif sech aus engem EU-Fong finanzéieren, an deen all d’Memberstaaten abezuelen. D’Europäesch Kommissioun soll d’Weisungsbefugnis kréien, Asätz wieren awer nëmmen duerch en demokratescht Legitiméieren duerch d’Europäescht Parlament méiglech.

Dofir wëllen d’Piraten sech asetze fir:

Eng gemeinsam europäesch Verdeedegungsarméi opzestellen. Dës Arméi soll gemeinsam Besoinen definéieren, Sécherheetsanalyse koordinéieren an a Beräicher – wéi dem gemeinsamen Akaf an der Maintenance vun Ausrüstung an der Ausbildung vu Rekrutte – zesummeschaffen.