Här President,
Et ass ee Mix aus Trauregkeet a Roserei an bei ville Leit sécherlech och Angscht, wou dëse Krich ausgeléist huet. Ja déi Invasioun an der Ukrain huet ganz vill Emotiounen an Europa a weltwäit ausgeléist.
Ja, och bei den Awunner hei am Land.
Laang war een net méi gewinnt, Zuelen ze héieren, wéi Kanner musse stierwen. Dat net duerch iergend eng Pandemie, en Ongléck oder eng Naturkatastrophe, mee gewollt duerch Waffen aus engem anere Land, Zaldoten wou bewosst dohin geschéckt gi sinn.

Ech mengen déi Biller wou mir gesinn hunn, wou ganz normal Awunner, quasi mat engem Reech sech virun de Panzer stellen, fir dass deen net an d’Ukrain erakënnt. Dat si Biller, déi een aus dem europäesche Kontinent net méi kannt huet, an op d’Schlëmmst ze verurteele gëtt. An do gëtt et och keng Nuance oder eng Excuse, déi ee kéint fannen fir dat Verhale vun der aktueller russescher Regierung. 
Elo musse ganz kloer d’Limitten opgewise ginn fir de Präsident Putin, well, mir mussen eis jo näischt virmaachen, wann en d’Ukrain sollt kréien, wat mir als Piraten net hoffen, mee sollt kréien, wäert déi Persoun mat deem psychologesche Schema wou an am Moment fiert net an der Ukrain ophalen.
Mir Piraten ënnerstëtzen d’Material an och d’Waffe-Liwwerung wou d’Lëtzebuerger Regierung beschloss huet, un d’Ukrain. Dat sinn defensive Waffen. 100 Panzer-Ofwierrakéiten, déi sécherlech méi dozou wäerte bäidroen, wéi de symbolesche Reech, wou déi eenzel Leit kënnen hunn, fir de Panzer ze stoppen.
Ja, mir sinn eis och bewosst, et ass en Tabubroch an der Lëtzebuergescher Politik, an der europäescher Politik, mee et war net d’Demande vun der EU, wou dohi gefouert huet, et ass eng Reaktioun op eng Politik vu Russland.  
Wat d’Sanktiounen ugeet, déi ënnerstëtze mir an do musse een natierlech éierlech soen, dass dat éischter en EU-Dossier ass. Mir als Lëtzebuerg kënne soen, dass mir se gutt fannen, mee mir mussen awer éierlech sinn a soen, dass d’EU wou do d’Gewiicht huet an do kënne mir och houfreg drop sinn, dass Lëtzebuerg iwwerall sech bedeelegt huet, bei den eenzelen Sanktiounen an Europa.
D’Energiepolitik, ja, déi musse mir iwwerdenken. Mir sinn awer nu mol lo an der Situatioun, dass mir et net vun haut op muer iwwerduecht kréien. Dass mir net einfach et geännert kréien. Dat heescht, mir mussen elo, an dëser Situatioun, kucken, dass mir eng Energiesécherheet hunn, dass mir net herno um Dréchnen sëtzen, dass mir elo nach duerch déi kal Zäit kommen.
Ech war selwer iwwerrascht, dass mir iwwerhaapt hei en RT-Sender, ech sinn och Client bei déier Lëtzebuergescher Kommunikatiounsfirma, dass mir iwwerhaapt sou eppes hei am Fernsee hunn. An ech sinn och frou doriwwer, dass mir elo gesot hunn, dass all déi Sender an Europa net méi sollen ausgestraalt ginn, well et huet näischt mat Meenungsfräiheet ze dinn, wann e Regierungssender, dee reng dofir do ass Propaganda ze senden, fir de Präsident, wann dee weider hei ausgestraalt gëtt.
Dat wär keng Meenungsfräiheet, genau am Contraire.
Eng kléng Kritik bréngen ech awer dann och un, un d’Lëtzebuergesch Regierung, wou mir mussen e klénge Schrëtt nobesseren, an ech mengen och do op oppen Oueren ze stoussen. Dat ass lëtzebuergesch Fligeren, déi am Moment nach vu russeschen Oligarchen benotzt ginn, fir Sanktiounen ze ëmginn, well déi leider eng LX-Kennung hunn, soumat dierfen déi an Europa fléien.
Mee d’Lëtzebuergesch Regierung huet awer Moyenen fir déi op de Buedem ze bréngen an ech mengen do stoussen ech op oppen Oueren fir dass net mir herno als Land do stinn, wou dat Lach opgelooss huet.
Et muss een och ganz kloer soen, et dierf een elo net all russeschen Bierger verdamen, am Contraire. Ech kenne russesch Bierger, déi hei liewen, déi eng ganz kloer kontra Putin, kontra hir Regierung Positioun ageholl hunn. An et sinn och vill Leit a Russland selwer, déi dës Positioun ageholl hunn, awer bekanntlech net ausliewe kënnen.
Ech mengen dir hutt alleguerte matkritt, déi éischt Demonstratiounen, wou d’Bevëlkerung, a mäi Respekt gëllt all deene Leit, déi de Courage iwwerhaapt hunn fir zu Moskau oder St. Péitersbuerg op d’Strooss ze goen fir ze demonstréieren.
Dass de Präsident déi mat, ja, aller Gewalt rëm agedämmt huet, fir dass och nëmme net iergend eng Demonstratioun ka stattfannen, mee ech si fest dovun iwwerzeegt, dass e groussen Deel vun deene Leit déi a Russland liewen net averstane sinn, mat deem wat hire Präsident gemaach huet.
Zu der Demande fir den EU-Bäitrëtt vun der Ukrain, do sti mir Pirate ganz favorabel fir dat Verfaren opzehuelen. An dat ass och en Dossier, wou bësse leie bliwwen ass, well bekanntlech, 2014 bei der oranger Revolutioun, waren déi Diskussioune schonn, mee, egal wéi mir d’Verfaren herno géingen dréinen a kéieren, wäert dat an der aktueller Situatioun leider net schnell genuch sinn, fir der Ukrain ze hëllefen.
D’Solidaritéit an Europa ass immens wichteg. Ech kann se och bal nëmme luewen, haut koum e klénge Bémol bäi, wéi Ungarn gesot huet, se géinge keng Waffeliwwerunge vun europäesche Länner duerchloossen. Ech huelen dat mol einfach als, naja…
Dir kennt den Orban.
Mee, déi grouss Solidaritéit an Europa steet awer an ech mengen mir wäerten och nach um diplomatesche Wee, Ungarn iwwerzeegen fir déi Waffeliwwerung, och vun hirer Grenz duerchzeloossen.
Wa mir alleguerten zesummenhalen als Europa, NATO, weltwäit, ech mengen dir musst iech bewosst sinn, och Australien mécht mat, ganz wäit ewech, dir Waffen ze liwweren, fir der Ukrain ze hëllefen, kënne mir déier Situatioun entgéint goen.
Et ass elo de Moment fir der russescher Regierung d’Limitten opzeweisen, fir net dass nach méi Leed wäert entstoen. Dofir Merci un all déi Bierger, op der ganzer Welt, wou sech géint de russesche Präsident stellen.
Merci.