M. Marc Goergen (Piraten) | Merci, Här President.
Jo, Här Lamberty, Dir hutt Recht! Ech komme mir es
net méi zou. Also, wann ech mech nach erënneren un
d’Diskussioune vun den Demonstratiounen a wat net
nach alles, déi den Här Kartheiser hei ugefouert huet,
an elo kënnt en hei an hätt gär méi Sécherheet. Also
ech weess net, a wéi enger Welt ech liewen!
Mee zum Projet: Natierlech wäerte mir dat matstëmmen. Och merci un d’Stéphanie Empain fir de gudde
Rapport. Ech liewen an engem Dräilännereck do ënnen zu Péiteng. De Gangster weess net, wann en zu
Rodange duerch de Rond-point fiert, a wéi engem
vun deenen dräi Länner en nach ass.
(Hilarité)
Dofir ass et wichteg, dass mer do grenziwwerschreidend ënnerwee sinn, well et mierkt een et och, wann
een …
Une voix | E weess net, wou en ass.
(Hilarité)
M. Marc Goergen (Piraten) | … grad mat de Polizisten
do ënnen um Terrain schwätzt. Da soe se, dass et genau dat doten ass, wat se brauchen, well de Gangster
soss op eemol fort ass a si stoe musse bleiwen. An ech
mengen, déi Situatioun dierfe mer net akzeptéieren an
deementspriechend ass dat heite Gesetz haut gutt.
A mir hunn elo gutt Erfarunge gemaach mat dem
Benelux-Traité, deen elo schonn dräi, véier Méint a
Kraaft ass, wou d’Poliziste just positive Feedback ginn
hunn. Da wäert dat och elo mat Frankräich an Däitschland de Fall sinn.
Merci.
M. Fernand Etgen, Président | Merci, Här Goergen.
M. Sven Clement (Piraten) | Ganz gutt!