De Premier Xavier Bettel huet am leschten Etat de la Nation virun de Wahlen e Bild vu Lëtzebuerg gezeechent wat vill Matbierger nach ni vun no gesinn hunn. Et gouf e Bild gezeechent vun engem Land an deem villes einfach an dat meescht gutt ass.
D’Pirate vermëssen hei kloer Aussoen vum Premier zu de Problemer déi eis Matbierger all Dag beweegen oder eben am Stau stoe loossen. Infrastrukturen déi kuerz virum Kollaps stinn, ëmmer méi Mënschen déi wéinst ze deierem Wunnraum an hirer sozialer Mobilitéit ageschränkt ginn, Schoulsystem, deen weder Bildung, nach Ausbildung bidd an Wahlverspriechen déi net ageléist goufen sinn nëmmen e puer Themen déi de Premier net wollt uschwätze well se net a säi Bild vu Lëtzebuerg passen.
D’Bild wat de Premier vu Lëtzebuerg zeechent ass e Bild vun enger klenger Elite!
sou de Sven Clement, President vun de Piraten
Wéineg Wierder goufe verluer fir all déi Matbierger bei deenen um Enn vum Kont nach vill Mount iwwreg ass ze stäerken respektiv jonk Familljen e bessert Liewen z’erméiglechen.
Och wa mir d’wirtschaftlech Entwécklung vu Lëtzebuerg begréissen, sou bleift de Saz vum Premier, Lëtzebuerg wier eng StartUp-Natioun eng huel Phrase. Wien eemol probéiert eng Firma zu Lëtzebuerg zegrënnen gëtt mat archaesche Systemer beim fréieren RCSL a wéineg Versteesdemech bei ville Verwaltungen “begréisst”.
Lëtzebuerg muss als Land attraktiv fir kleng a mëttelstänneg Betriber sinn, dat geet nëmmen doduerch, datt Prozeduren weider vereinfacht ginn a Restriktiounen no an no ofgebaut ginn, nëmme sou kënnen laangfristeg genuch Aarbechtsplazen fir all eis Awunner an alle Secteure geschafe ginn!
sou de Sven Clement ofschléissend
E renge Fokus op High Tech hëlleft net de strukturellen Aarbechtsloseproblem an de Grëff ze kréien. De Xavier Bettel hätt besser gehat, amplaz vun engem Schlaraffeland ze schwätzen, d’Realitéit vu ville Bierger konkret unzeschwätzen an Ängschten unzegoen!
