D’Piratepartei ënnerstëtzt de Festival GAYMAT a widderhëlt d’Fuerderung zu Lëtzebuerg endlech all Mënsch gläich ze stellen – onofhängeg vu Geschlecht oder sexueller Identitéit.

“Nieft der längst iwwerfälleger Gläichstellung vum Bestietnis tëscht homosexuellen an heterosexuelle Partnerschafte mussen och d’Regelen zur Adoptioun fir all Mënschen t’selwecht sinn. Eng homosexuell Koppel ka genau esou gutt Kanner erzéie wéi dat heterosexuell Partner kënnen – dës Diskriminéierung muss ophalen!” sou de Marc Goergen, Vize-Präsident vun der Piratepartei. D’Pirate fuerderen eng komplett Gläichstellung, mat alle Rechter a Flichten, onofhängeg vum Geschlecht vun de Persounen.

Donieft wëllen d’Piraten op d’Situatioun vun den transgender Leit zu Lëtzebuerg opmierksam maachen. “Nieft den héijen administrativen Hürde bei engem Changement de Sexe kréie Persounen, déi de Schrëtt zu enger Transitioun maachen nach ëmmer net all d’Fraise vun der Krankekees rembourséiert. Och den Accès zu wichtege Medikamenter, déi dee Prozess ënnerstëtzen, ass net garantéiert.” sou de Marc Goergen. Nieft enger vereinfachter Prozedur beim Changement de Sexe fuerdert d’Piratepartei och d’Aféiere vun engem drëtte Geschlecht. “An Australien kënne Persounen, déi sech net am binäre System “Mann oder Fra” erëmerkennen een Drëtt Geschlecht op offiziellen Dokumenter uginn. Och zu Lëtzebuerg muss dës Méiglechkeet geschaf ginn, fir dass trans- an intersexuell Mënschen ee selwerbestëmmtent Liewe genéisse kënnen!” sou de Marc Goergen ofschléissend.

D’Fuerderung no kompletter Gläichstellung vun alle Persounen, onofhängeg vu Geschlecht oder vun der sexueller Identitéit, ass Deel vun der Piratepartei hirer Campagne fir d’Wahlen 2013. Onse Slogan “Reboot Luxembourg – Lëtzebuerg neistarten” gëllt och fir d’Gesellschaftspolitik: Schluss mat Diskriminéierung opgrond vu Geschlechts- a sexueller Identitéit, Gläichstellung elo!